Skywalk leh ropeway la chhui zo lo; ACB-in Lokayukta-ah hun an dil belh dawn

Anti Corruption Bureau (ACB) chuan Sakawrhmuituai tlanga skywalk leh, Chaltlang leh Durtlang inkara ropeway siam chungchang an la chhui zo lo a, Mizoram Lokayukta-ah hun a dil belh dawn.

Vanglaini thu dawn danin, Lokayukta chuan ACB chu skywalk leh ropeway siam chungchang an chhuina November 2024-ah thehlut turin an ti a, mahse, ACB hian an la chhui zo lo a, Lokayukta-ah hun dil belh an tum a ni.

ACB hian thil chhui chian ngai a la tam avang leh ropeway leh skywalk siamtu JV NEIP, Delhi chu Mizoramah thu zawhfiah belh tura koh chhoh leh an la ngaih avangin thubuai hi an la chhui zo dawn hnai lo deuh a ni. JV NEIP hotute chu a hmain Mizoramah koh chhoh an ni tawh a, Delhi-ah kal chilh an ni tawh bawk.

JV NEIP hian tun hma chuan Aizawlah pisa an nei ṭhin a, mahse, tunah chuan an nei tawh lo. Delhi-a kal chilh emaw, Mizorama koh chhoh emaw a ngai ṭhin.

Tarlan tawh ṭhin angin, MNF party-a Vigilance department leh Legal Board chuan skywalk leh ropeway siamnaah thil dik lo a awm nia ngaiin November 22, 2021 khan Lokayukta-ah complaint an thehlut.

December 7, 2021 khan Mizoram sorkara Vigilance department-ah chhui phalna thehluh a ni a; Vigilance chuan December 17, 2021 khan chhui phalna a tichhuak a, chu chu ACB-in December 22, 2021-ah an dawng. ACB hian January 2022 laihâwl velah a chhui ṭan a ni.

Tourism department pawhin skywalk leh ropeway chungchang chu Director hmingin February 3, 2022 khan Lokayukta-ah an thlen ve bawk. Lokayukta-in thil hrang hrang a zawh lêt zingah, rinhlelh an neih leh neih loh chungchang a tel a, Tourism department hotute chuan mimal/company rinhlelh tarlan an nei lo a ni.