Mizoramah thla khat kal ta chhungin ASF lên tharna khua 5 chiah a awm

Tun hnai thla khat chhung, November 4 aṭanga December 4 thleng khan Mizoramah vawk pûl hri, African Swine Fever (ASF) lên tharna khua panga a awm a; hemi hun chhung vek hian kumina hri lênna hmun chhinchhiah tawh khua/veng 257 zinga 218-ah hri vanga vawk thi a awm tawh lo.

Animal Husbandry & Veterinary (AH&Vety) department-in ASF vanga vawk thi leh suat zat a tarlan danin, kumin November 4 aṭanga December 4 chhung khan Lunglei district-a Sachan leh Tuichawng khua te, Siaha district-a Maisa leh Lopu khuate leh, Saitual district-a NE Tlangnuam khuate chu hri vanga vawk thi awm tharna khuate a ni. Hemi hun chhung vek hian heng khua panga bakah khua/veng dang 34, a vaiin khua/veng 39-ah vawk thi 458 a awm.

Kuminah January aṭanga nimin thleng khan AH&Vety department chuan ASF hri lenna (infected area) khua/veng 257 a chhinchhiah tawh. Hetih lai hian, Vanglaini-in data a lak khawm theih chinah khua/veng 257 zinga 218-ah November 4, 2024 hnu lamah ASF vanga vawk thi report a awm tawh lo.

ASF hri darh tur ven nan kuminah hri lenna khua/veng 257 zinga 209-ah vawk 24,098 suat a ni tawh. November 4 - December 4, 2024 chhung bikah khua/veng 209 zinga 19-ah chauh vawk suat a ni a, a bak khua/veng 238-ah chuan ni 30 chhungin vawk suat report a awm lo a ni.

Kumin November 4 aṭanga December 4 chhung hian Mizorama district 11 zingah Champhai leh Lawngtlai district-ahte vawk thi leh suat a awm lo a; infected area tam berna Aizawl district (204)-a khua/veng pahnihah vawk thi pali awmin, vawk suat a awm lo. Siaha, Mamit, Khawzawl leh Saitual district-ah pawh ni 30 chhung vawk suat a awm tawh lo bawk.