Speaker-in Zo Indigenous Identity Card a tlangzarh

Mizoram Legislative Assembly speaker Lalbiakzama chuan nimin khan a pisaah Zo Re-Unification Organisation (ZORO) buatsaih UN Declaration on the Rights of People’s behchhana Zofa Indigenous People’s tana hman tur Zo Indigenous Identity Card a tlangzarh.

Lalbiakzama chuan, UNO-in indige-nous people-te a ngaih pawimawh thu leh Zo fate chu indigenous people-a a pawm tawh thu a sawi a, "Hnam lian leh chak zawkte'n an awp beh mek indigenous people-te chhan chhuah an nih theih nan UN Declaration on the Rights of People’s chu kum 2007 daih tawhah siam a ni a, he UNO thupuan hi kan hman ṭangkai thiam deuh deuh a ṭul," a ti.

Assembly Speaker chuan, Zo fate chu British sorkar 'divide and rule policy' tuar nasa ber an nih thu sawiin, "Kan duh vang ni miah loin ram pathum - India, Myanmar leh Bangladesh-ahte ṭhen sawm kan ni a, India-ah phei chuan state pali - Mizoram, Manipur, Tripura leh Assam-ahte ṭhendarh kan ni. Kan inunauna leh thisena kan inzawmna a bo chuan loh avangin kan indâwmkana inchhawmdawl zel a ṭul. Kan la tlem avangin inlungrual lo tham kan awm lo a, kan inlungruala kan insuihkhawm lehzual a ngai a ni," a ti. Zo fate inkara inremna a awm theih nan hma la chhunzawm zel turin ZORO a chah bawk.

Inkhawm hi ZORO president R Sangkawia'n a kaihruai a, general secretary (foreign affairs) Dr Lalrinawmi Ralte, general secretary (organisation) L Ramdinliana Renthlei leh treasurer Michael Lalthanmawia ten pawhin thu an sawi a ni.