MSCI-ah cancer damlo zaina hawn a ni

Health & Family Welfare minister Lalrinpuii chuan nimin khan Zemabawka Mizoram State Cancer Insti­tute (MSCI)-ah cancer damlote zai theih­na Operation Theatres Complex leh a ken tel damlo na zualte enkawl theihna intensive care unit (ICU) a hawng.

HFW Minister chuan, MSCI-a surgery service leh ICU hawn tâk chu khawsak harsa zawk tam tak, phai panna tur nei lote'n nasa takin an chhawr ṭangkai thei dawn tih sawiin, "Civil Hopsital, Aizawl leh ZMC-a inzai ngai tam tak chu hetah hian an inzai thei tawh dawn a, heng damdawi-in lian pahnih hi a chhâwk zângkhai thei dawn a ni," a ti.

MSCI-ah inzaina din a nih theihna tura hmalakna sorkarin a ngaih pawimawh thu sawiin Minister chuan, "MSCI-a thawk cancer zai thei doctor-te puibâwm theitu nurse leh thawktu dangte dah belh a ni a, mahse, hengte hi a tlem thei ang ber (bare minimum) chauh a ni chungin surgery team hi din a ni," a ti a; MSCI leh Mizoram hriselna dinhmun tihchangtlunna méllung pawimawh a nih thu a sawi.

Health Minister chuan, thingtlanga damdawi-in primary health centre-ahte damlo admit an tlem a, district hospital-te erawh mipuiin an bâwr hle tih sawiin, "Rural health lamah chuan kan ṭha thawkhat a, tertiary sector lam, specialist sector lamah doctor leh tunlai hmanraw changkang lamah kan pachhe viau. District hospital leh damdawi-in liante tihchangtlun leh thuam ṭhat sorkarin a ngai pawimawh," a ti.

Lalrinpuii chuan, ZMC-ah in vitro fertilization (IVF), lung zaina (cardiothoracic surgery), thluak zaina (neurosurgery)-te ṭan a nih theih nan kawng dap mek a nih thu a sawi bawk.

Hawnna inkhawm hi MSCI director Dr Lalhmingmawii'n a kaihruai a, medical superintendent Dr Jeremy L Pautu pawhin thu a sawi a ni.

MIZORAM STATE CANCER INSTITUTE

• Doctor 16 an thawk mek a, chu'ng zing 13 chu a nghet niin, pathum chu NHM hnuaiah con­tract-a thawk an ni.

• Cancer zai thei doctor pathum - gynane onco surgeon, onco surgeon superspecialist leh head and neck onco sur­geon an awm.

• Anesthesiologist leh thawktu dang dah belhin surgery service ṭan a ni a, mamawh leh a ken tel ICU khum pasarih awmna din nghal a ni.

• Operation Theatres Com­plex hnuaiah ope­ration theatre - major OT pahnih leh minor OT pakhat a awm.

• Operation Theatres Complex hi sorkar laipui scheme ‘Tertiary Cancer Care Centre’ hnuaia din a ni.