Bharatiya Bhasha Utsav buatsaih a ni

Saitual district Samagra Shiksha chuan nimin khan Keifanga District Higher Secondary School-ah Bharatiya Bhasha Utsav (Indian Language Festival) an buatsaih a ni a, Saitual district education officer Micky Lalenkawla'n a hmanpui. Festival thupui chu ‘Harmony in language and nature’ tih a ni.

Bharatiya Bhasha Utsav hi India ram pumah chawlhkar khat chhung hman tur a ni a, Tamil poet leh freedom fighter Subramania Bharati pian champha December 11 hriatreng nan hman ṭhin a ni. India rama ṭawng hrang hrangte inpumkhatna leh ṭawng hrang hranga India hausakna chawi nung a, mi tinin ṭawng dangte inzahsak tawnna leh ṭawng inzirtir tawnna nei tura ruahman a ni.

Keifanga District HSS-a Bharatiya Bhasha Utsav hmannaah hian zirlaite tan India rama state hrang hranga ṭawng hman inhriatsiakna, Quiz on Indian State Language buatsaih a ni.

Bharatiya Bhasha Utsav-a khuallian Micky Lalenkawla chuan, India rama ṭawng hman lar berte zinga mi Hindi leh English thiam a pawimawh thu sawiin, "India ram zau zawka kalin Hindi leh English thiam ṭangkaina a lang zual ṭhin. Mizo ṭawng hi tunlai ṭhalaite'n an hmang dik lo nasa ṭhin a, hnam humhalh tur chuan kan ṭawng kan humhalh tlat a ngai," a ti a; Mizo ṭawng hmang dik tur leh humhalh turin zirlaite a chah.