Mamit MLA-in lei dawh a enfiah

Mamit bialtu MLA H Lalzirliana chuan nimin khan Lengpui Airport panna kawng, Sihhmui bul Tlawng luia lei dawh mek a enfiah a; hna thawktu Poddar Infratech Pvt. Ltd. hotute chu mipui harsatna sutkian thuai a nih theihna atan chak taka hna thawk turin a ngen.

H Lalzirliana chuan, lei dawh chu November 30, 2024-ah zawh tura ruahman a nih laiin, a hun taka dawh zawh a ni lo chu Mamit district mipui bakah, Lengpui Airport kaltlanga zin veivâkte'n harsatna an tawh phah nasat thu a sawi a; Mizoram khawthlang lam mipuite'n kawng hrang hrangah harsatna nasa tak an tawh avangin a rang thei ang bera dawh zawh a nih theih nan hna thawktute chu ruahmanna a siampui a ni.

Ruahman dan chuan, Tlawng lei dawh hna hi December 6-10, 2024 inkarah zawh tum a ni a, chumi chhung chuan zawh vek a ni lo a nih pawhin December 11, 2024 aṭang chuan lirthei zawh theih tura hawn a ni ang.