MCAB-in an lawmman dawn an lawm

Mizoram Cooperative Apex Bank (MCAB) chuan 'Annual Performance Award for Best Performing State Cooperative Bank II-Tier Structure 2023-24' an dawn chu November 3, Thawhlehni khan Chaltlang Tourist Lodge-ah an lawm a, Cooperation minister PC Vanlalruata'n a hmanpui.

Cooperation Minister chuan, MCAB-in cooperative bank ti ṭha chawimawina a dawng thei chu Mizoram anga inchhuanna tham a mnih thu a sawi a, "Cooperative dinhmun hian Mizoram ei leh bar thlengin a nghawng a, sorkar chu bank-te nena ṭanghoa mipui tana thawk tur a nih angin mipui tana rawngbawlna thinlung pua thawhhopui turin bank-te ka sawm che a ni," a ti a, sorkar policy-te ngun lehzuala vilpui turin a sawm.

Award lawmna inkhawm hi MCAB chairman Lalnunsanga'n a kaihruai a, Cooperative Societies registrar John LT Sanga leh MCAB director Rosiamliana Ralte te pawhin thu an sawi.

Mizoram Cooperative Apex Bank hi July 31, 1982-ah Mizoram sorkarin a din a, thawktu 300 chuangin branch 30 leh ATM booth 38 an enkawl mek. India rama II-Tier State Cooperative Banks zinga tehfung hrang hranga ti ṭha ber nihna hi kum 2022-23 leh 2023-24-ahte an dawng.

MCAB hian financial year kal mekah pawisa an dawn (deposit) cheng vbc. 1,539.2 aṭangin loan cheng vbc 1,206.1 a pe chhuak tawh a, deposit an dawn aṭanga loan an pek chhuah tehfung (CD ratio) chu 78.8% niin, Mizorama bank zingah pawisa dawn aṭanga teha loan pe chhuak ṭha ber an ni mek.