Hnahthialah ruihhlo do tawh dan thlirho

Hnahthial district Nasha Mukt Bharat Abhiyaan Committee chuan nimin khan chairman Rita Lalnunmawii Pachuau, bawrhsap kaihhruaiin ruihhlo donaa hmalak tawhnate an thlir a; ruihhlo do beihpui thlakna puala intihsiakna result puan nghal a ni.

Ṭhukhawm chuan mipuiin ruihhlo donaa an thil hriatte ziaka an thlen theihna tur bâwm (drop box) kalpui ṭan tawh ni se, an ti. Drop box hi Hnahthial khaw chhungah pahnih leh khaw dang zawngah pakhat ṭheuh dah tura tih a ni a, YMA-te kuta dah tur niin, mi nâwlpui hawn theih loh turin kalh a ni ang.

Ruihhlo do beihpui thlakna puala intihsiakna pahnih - chanchinbu editorial-a ruihhlo do chungchang chhuah ṭha ber leh ruihhlo do chungchang whatsapp status tur short film insiamsiak lawmman sem a ni. Chanchinbu ti ṭha ber chu Calathea chanchinbu (editor F Zosangliana) a ni a, pahnihna Kailawn chanchinbu (editor VL Liansanga) leh pathumna Hnahthial Times (editor H Lalthanghuta) te an ni.

Ruihhlo do beihpui thlaknaa 'Short film for whatsapp status' intihsiaknaah Andrew Lalfakawma pakhatna a ni a, Maruata Boitlung leh TC Lalmuanthanga ten an dawt.

Intihsiakna chi hnihah hian pakhatnain Rs 5,000, pahnihnain Rs 3,000 leh pathumnain Rs 2,000 an dawng dawn a; lawmmante chu December 13, 2024-ah Excise & Narcotics Minister-in Hnahthial DC conference hall-ah a sem ang.