PARAKH Rashtriya Sarvekshan kalpui ṭan; Education Minister-in a biala sikulte a tlawh

Ministry of Education hmalakna Educational Achievement Survey lian 'PARAKH Rashtriya Sarvekshan' (PRS) 2024 hnuaiah nimin khan Mizorama sikul thlan bik 1,058-a pawl 3, pawl 6 leh pawl 9 zirlaite enfiahna leh zirchianna ṭan a; hemi pual hian School Education minister Dr Vanlalthlana'n survey neihna sikul ṭhenkhat a tlawh.

PARAKH Rashtriya Sarvekshan 2024 hi tun hmaa National Achievement Survey tih ṭhin a ni a, India rama zirna chungchanga zirchianna (survey) lian ber niin, zirlaite'n an thiam tura duante an zir chhuak em tih enna tura buatsaih a ni.

National Education Policy 2020 tum bulpuite ngaih pawimawh a nih dan te, zirnaa hnufualna te, zirna huapzo (inclusive education) kalpui a nih dan te, education policy duangtute'n quality education atana policy ṭha an duan theihna tura an hriat tur pawimawhte PARAKH Rashtriya Sarvekshan hian a hrin chhuah beisei a ni.

Minister Dr Vanlalthlana hian a bial chhunga Rosebud School, EM Primary School leh Ramhlun Vengthar Primary School-te a tlawh a; an hmunhmate enpui bakah, an harsatna leh mamawhte headmaster leh zirtirtute a sawipui.

Education Minister hi School Education director Angela Zothanpuii, SCERT director Caroline Zoramthangi leh Aizawl district education officer R Lalbiakzauva ten an ṭawiawm a ni.