Covid-19 vanga harsatna tâwkte senso tum vek turin sorkar phût

MPC party chuan thuchhuah siamin, "Mizoram sorkarin mipui himna aia MNF party hamṭhatna tur ringawt a buaipui len zawk vanga hripui kai, harsatna tâwk leh enkawl mekte senso zawng zawng tumsak vek turin CM Pu Zoramthanga kan phût tak meuh a ni," an ti.

MPC chuan, a ni têla an pung chu sorkarin mipui hmakhua aia MNF party hamthatna tur ringawt a engto zawk vanga an ngaih ngheh tlat thu an tarlang a, "MNF sorkarin eptu party-te ṭan rualpui duh loa 'Rotekawla se pa' ang maia lalna leh thuneihna chan ringawt a duh luat vanga inthlan a kaltlangpui lui te, Covid-19 donaa rorelnaah eptute a thlim tlat vang te, eptu MLA-te kháwl lei a do tlat vangtein hripui kai an pun phah a ni," tiin, sorkarin ram leh mipui a thamlohzia tilangtua an ngaih thu an sawi.

Hemi rual hian MPC chuan, mipui him zawkna tura September 11-17, 2020 chhung Aizawla partial lockdown kalpui chu ṭha an tih thu an tarlang.