KHAWTHLIR

LMC ṭhukhawm

Lunglei Municipal Council (LMC) Board of Councillors chu nimin khan BoC Hall-ah vice chairman K Lalrinawma kaihhruaiin an ṭhukhawm a, Hauruang kawnga 'Riangvaite Thlanmual' chungchangah a hmun leh a enkawl mawhphurhnate chu LMC kuta a awm theih nan hmalak an rel. LMC huam chhunga local council (LC)-te chu village council an nih tawh loh avangin sorkar department-te'n lehkha an tihchhuahah 'VC/LC' tia address-a ziak tawh turin department-te hnenah ngenna siam an rêl bawk.

Ṭanpuina hlan

Mizo Photographers' Society chuan an din champha (December 4) pualin nimin khan Mizoram State Cancer Institute-a Hospital Poor Fund-ah Rs 50,000 an hlan. Pawisa hi pawl sum leh an member-te thawh khawm a ni.

PMEGP campaign

Lawngtlai District Industries Centre (DIC) leh Khadi and Village Industries Commission (KVIC) ṭang dun chuan nimin khan Lawngtlai DC conference hall-ah PMEGP Awareness Campaign an buatsaih a, bawrhsap Cheemala Siva Gopal Reddy-a'n a hmanpui. KVIC hotute leh bank aiawhte'n PMEGP loan chungchanga hriattur pawimawhte an sawihfiah a ni.

Pool accommodation

Saitual bawrhsap Dr Lalngura Tlau hoin nimin khan sorkar hotute'n sorkar hnathawkte chenna tura sorkar ruahmanna General Pool Accommodation chungchang an sawiho. December 6, 2024 hmain department tinte'n staff, quarters leh ram an neih dante DC office-ah thehluh vek ni se, an ti. An rorel hi sorkara la thlen leh tur a ni.

Vawk chaw herna

Serchhip district cooperative officer L Lalzidingi chuan nimin khan Serchhip P&E Vengah Serchhip Town Piggery Cooperative Society vawk chaw herna in leh khawl a hawng. Vawk chaw herna khawl leh a ken telte hi PMJVM aṭangin Rs 5,00,000 senga lei a ni a, darkar khatah quintal 80 vel a her thei. A in sakna atan Serchhip DRDO aṭangin NREGS hnuaiah Rs 3,00,000 leh bialtu MLA aṭangin Rs 3,00,000 an dawng a ni.