Mipuiin Congress lam an hawi mek - MPCC Communication

Mizoram Pradesh Congress Committee (MPCC) Communication department chuan thuchhuah siamin, ZPM thlipui leh MNF therhlo karah mipuite'n Congress lam an hawi mek niin an tarlang.

MPCC chuan, "Local council leh village council inthlanah sorkar lai MNF party-te'n therhlo tiama an mi leh sate an kar chhuahna karah leh ZPM-in an party thlipui a tleh tia an sawi karah Congress chu mipui vantlang beiseina aia sangah a invawrh a, Mizo mipuite'n sakhaw zalenna chawi sangtu leh mi retheite dâwm kângtu party lam an hawi leh mek tih a lantir," an ti.

Congress party chuan 'Diknain a hneh ṭhin' tih bâk tawktarh tur nei loin VC/LC inthlan an hmachhawn nia sawiin MPCC chuan, "Chuti chung chuan party lian leh ngêlnghet a nihzia a lang a, khua/veng hrang hrangah sorkar lai MNF lehthalin sorkarna kan siam a ni," an ti a; Congress-in sakhaw zalenna chawisan leh mi retheite dâwm kân an tumna chu mipuite'n an hria nia an ngaih thu an sawi.

MPCC Communication chuan, ZPM chu party ṭhang duang tak anga insawi tih tarlangin, "An MLA neih zinga an chhuan ber biala ZPM ṭhatna nia an sawi ṭhin LC inthlanah seat khat an la thei hrâm a ni," an ti a; ZPM chu Aizawla LC inthlanah party mala sorkarna veng pahnih chiah an neih avangin, an mi leh sate rilru hnual tur vên nan an mi ni sate an lawm lut mai niin an tarlang.