Covid-19 contact tracing leh test sawifiah
Kolasib Chief Medical Officer (CMO) chuan nimin khan thuthar thehdarhtute kâwmin, Covid-19 hnuaia contact tracing kalpui dan leh swab sample test neih dan a sawifiah.
Kolasib CMO chuan, contact tracing leh test tih dan chungchangah sorkarin kalphung a duante mipuiin an hriat a ṭul thu sawiin, "A ṭul anga felfai taka hmalak a nih theih nan leh mipui an chîâi loh nan tih tur leh tih loh tur kan hriat tlàn a ṭul a ni," a ti.
• Covid-19 veia rinhlelhte chu an awmna aṭanga hnai ber health worker/medical officer hnenah an inhriattir vat tur a ni a, contact tracing format-1 hmangin MO/HW-in CMO Office-a IDSP Section-ah rang takin report an pe ang. Contact tracing team-in buaipui nghalin, a ṭul angin an thlifim ang a, endik ṭul apiangte an tihsak zel ang.
• Contact tracing team hi Kolasib khawpui, CHC/PHC level leh sub-centre level-ah din vek a ni a; mahni bial ṭheuha positive contact neite contact tracing format-1 hmangin CMO office-ah an hriattir ang.
• Khaw/veng tin VTF-te'n rinhlelh an neih chuan contact tracing team-ah report pek hmasak a pawimawh ber.
• Positive contact neite endik nan Rapid Antigen Test hman phal a ni lo a, RT-PCR emaw TrueNAT chauh hman tur.
• Kolasib khawpui pawna mi endik ngai, Kolasib kal remchang thei lo an awm chuan an bialtu PHC/CHC-ah sample collection team-in kal chilhin swab sample an la ang a, team-te hman tur veivahna chu Kolasib DC-in a ruahman tawh.
• First contact ni lo, mahni dinhmun hriat duh vanga inendiktir duhte chuan RT-PCR-ah Rs. 4,500, TrueNAT-ah Rs. 3,000 an chawi a ngai. Swab sample lak chu a positive chuan Covid Care Centre (CCC)-ah dah luh nghal zel a ni ang a, negative-te chu ni 14 chhung home quarantine tur a ni.