Kalphung tharah sorkar hnathawkte eirukna lakah an fihlim tur a ni - CM

Chief minister Lalduhoma chuan nimin khan Aijal Club-a Mizoram Finance & Account Service Association (MFASA) Annual General Conference vawi 29-na a hmanpuinaah thu sawiin, kalphung thar sorkarah chuan sorkar hnathawkte eirukna lakah an fihlim tur a ni tih a sawi.

CM Lalduhoma chuan, kalphung tharah chuan sorkar hnathawkte eirukna laka an fihlim ngei a ṭul thu sawiin, "Finance officer-te phei chu in dik mai a tâwk lo, mi dangin mi dik in ni tih an hmuh a ngai. Sorkarin hnathawk a lak hian human resource investment a nei tihna a ni a, kha hnathawktu kha sorkar tana thawk chhuaktu ṭangkai a nih zui ngei a ṭul," a ti.

Mizoram mipuiin an beisei inrêlbâwlna ṭha (good governance) a awm theih nan hnathawh endik (project monitoring) lamah ṭan an la nasa tih sawiin Lalduhoma chuan, "Dashboard hmanga ka office aṭanga project zawng zawng lo endikna tur kan peih ṭêp tawh. Service Review Committee pawh din turin thu kan chhuah a, aikal lak kan titawp," a ti a; biometric attendance an kalpui tawh thu a sawi.

Chief Minister chuan, local audit an tichak thu sawiin, "Kalphung ṭha zawk a awm theih nan special audit kan kalpui a, central sorkarin local body grant-te pe chhuak tura online audit a phût avangin hun rei tak grant kan lo dawng tawh lo. Hei hi kan bawhzui vat a, Delhi-ah ka zu sawi a, a hnu lawkah cheng vbc. 35 min rawn release sak ta a ni," a ti.

Inrenchemna lamah MLA-te'n bul an ṭan thu sawiin CM Duhoma chuan, "Kan hamṭhatna kan titlem a, official-te'n min zui. MLA leh minister-te'n hamṭhatna an dawn mek hi party tin MLA-te telna, Assembly General Purpose Committee pawmpui a ni. A tlem thei ang ber sum pûk ni se kan ti bawk," a ti a; state matching share nei sang chi scheme chu pumpelh hrâm tur a nih thu a sawi.

Lalduhoma chuan, an budget hmasa ber chu Mizoram dinhmun dik tak tarlang thei tura duan a nih thu sawiin, "Kan data neihte'n duhthu an la sâm chiah lo. Data dik tak neiha kan nihna dik tak hriat a ṭul a, data dik neih kawngah hmasawn zel kan tum. Budget proposal siam hun kan lo thleng leh tawh a, budget dik tak kawng hi department tinte'n i zawh ang u," a ti.

MFASA inkhawmpui hi an president Vanlalsawma'n a kaihruai a, member thar mi 10 lawm luhna hun an hmang. Mizoram Finance & Account Service Rules, 2021 angin post (cadre strength) 92 (sanction post) a awm a, chu'ng zinga 30 chu a ruak mek. Post 62 hnawhkhah mek a ni a, deputation post pakhat leh ex-cadre post pakhat an luah bawk.