Chhamb Battle Honour Day hmang

Ex-Fighting Fifth Association (EFFA), Mizoram chuan nimin khan Aijal Club-ah Chhamb Battle Honour Day vawi 53-na an hmang a, Indian Army 3rd Corps general officer commanding Lt.Gen. AS Pendharkar khuallian a ni a, Lt.Gen. JR Mukherjee (Rtd) leh Maj.Gen. PK Puri (Rtd)-te khualzahawm an ni.

Lt.Gen. AS Pendharkar chuan, kum 1971-a Pakistan leh India sipaite Chhamb khawpuia an indonaa 5th Assam Regiment-te huaisenna leh ram tana an inpekna chu ropui a tih thu a sawi a, "He inkahnaa thi te, hliamte leh rál donaa tel zawng zawngte chu zahna chibai ka bûk a ni," a ti.

5th Assam Regiment aṭanga chhuakte intélkhawm EFFA hian 5th Assam Regiment-in kum 1971-a India leh Pakistan indona, Chhamb Battle-ah an chêt ṭhat vanga Honour of Battle an hmuh hriatrengna hi kum tin December 5-ah an hmang ṭhin.

Nimina Chhamb Battle Honour Day hmanna inkhawm hi EFFA Mizoram president Sub. Lalṭana'n a kaihruai a; Chhamb indonaa sipai thi 21-te sûnna hun hman a nih bakah, hnam lâm leh zaite entir a ni.