History chhuina atan sorkarin hma a la - Art & Culture Minister

Art & Culture minister C Lalsawivunga chuan, Mizoram leh hnam tana history dik leh belhchian dâwl zawk a awm theih nan ṭanrual a ngaih thu leh Mizo history chhuina atana sorkarin hma a lak thu a sawi.

Mizo History Asso-ciation (MHA) chuan nimin khan PUC Seminar Hall-ah Annual Conference vawi 44-na an hmang a, 'Rewriting Mizo History' tih thupui zirhona an buatsaih nghal a; Art & Culture Minister-in hmanpuiin, Historical Journal, Mizoram 2024 a tlangzarh.

C Lalsawivunga chuan, "Mizoram leh hnam tana history dik leh belhchian dawl zawk a awm theih nan kan ṭanrual a ngai. Mumal leh ṭha zawka Mizo history ziah ṭhat leh hi a veiawm a, hemi atan hian vawiina seminar hi hmasawnna rahbi pawimawh tak a ni," a ti a; an pawimawhna leh ram tana an hlutnate hre nawn fo turin MHA member-te a chah.

Art & Culture Minister chuan, Mizo history ziaka awmah kimchang lo deuh a awma a hriat thu sawiin, "Mi hmasate an fakawm rualin, ziaka hmuh tur awm vak lo thil ṭhenkhat chu chhui chian leh ziaka dah ngei a ṭul. Mizo history chhuina atana sorkarin hma a la a, Delhi-ah bawhzui a ni," a ti.

C Lalsawivunga chuan, kimchang taka history ziah a nih theih nan leh history chhuitute'n harsa lutuk loa hmun pawimawh an tlawh theih dan tur ngaihtuahte a rilruah a awm thu a sawi bawk.

MHA conference leh seminar hi MHA vice president Prof. JV Hluna'n a kaihruai a; president Prof. Sangkima'n 'Mizo hnam chanchina R Vanlawma sûlhnute' tih thupui a sawi a ni.