Cooperative pawimawhna sawiho

Cooperation minister PC Vanlalruata chuan nimin khan Durtlanga SIRD-ah Cooperation department leh NABARD buatsaih, 'Campaign on Cooperation Among Cooperatives' a hawng a; 'Cooperation among Cooperatives' tih thupui hmang buatsaih Standard Operating Procedure a tlangzarh.

PC Vanlalruata chuan, thingtlang hmasawnna turin cooperative movement a pawimawh thu sawiin, "Mizoramin cooperative coverage huang zauh theihna nasa tak a nei a, tunah hian coverage 4% vel a ni a, hmarchhak state dangah chuan 12-26% vel daih a ni," a ti a; Sahkar se Samriddhi (Prosperity through cooperation) hmathlir tihlawhtling turin stakeholder-te thawhhona ṭha tak nei turin a chah.

Inkhawmah hian NABARD Mizoram deputy general manager T Guite-in 'Cooperative among cooperative' chungchang leh hma lam pan dan tur ruahmannate a tarlang.

Cooperation joint secretary Liangsangzuala, Cooperative Societies registrar John LT Sanga, NABARD Mizoram general manager Pankaja Borah leh Mizoram Cooperative Apex Bank chief executive officer A Lallungmuana ten thingtlanga sum thawh chhuah theihna kawng hrang hrang zingah cooperative sector pawimawhnate an sawi bawk.