Sipai bángte pawlin CM an kâwm

Mizoram Ex-Service League (MESL) hruaitute chuan nimin khan chief minister Lalduhoma a pisaah an hmu a, sipai bángte tana Mizoram sorkara hna hauhsak chung-chang leh thil pawimawh dangte an sawipui.

MESL hruaitute hian an president Lt.Col. Clement Lalhmingthanga, MLA hoin Chief Minister an hmu a, Sainik Welfare & Resettlement director Surg.Lt.Cdr. Lalnuntluanga leh MESL hruaitu dangte an tel.

Chief Minister chuan, ex-servicemen-te'n ram tan an lo thawh tawhna te, an pension hnuah pawh Mizoram tan an thawh hlâwkziate an hriat reng thu leh, ZPM sorkarin sipai bángte chu dan dinglai angin an chanvo leh reservation an pek zel tur thu a lo hrilh. Mizorama territorial army din chungchanga hmalak meknate an sawiho bawk.