Sialsuk khuain award dawn an lawm

Sialsuk khua chuan India ram pum huapa Best Tourism Village, Community Based, 2024 an dawn chu nimin khan an lawm a, Tourism minister Lalrinpuii leh bialtu MLA Baryl Vanneih-sangi ten an hmanpui.

Tourism Minister chuan, kalphung thar hnuaiah chuan tourism lamah hmasawnna thar a thleng mek niin a sawi a, "Event huaihawt lamah pawh mipuite'n hma hruaiin, sorkar chu a fual lai dâwmtu (facilitator)-ah a ṭang chho mek. Sorkar department-in huaihawt tawh loin, tender hmangin mithiam zawkte hnenah outsource ṭan a ni," a ti.

Sialsuk khuain India ram pum huapa Best Tourist Village - Community Based Tourism lawmman an dawng thei chu khaw mipui leh khawtlang hruaitute thawhhona tha vang a nih thu sawiin Lalrinpuii chuan, Sialsûk khua chu khualzinte'n tlawh an chak bucket list-ah telh a nih ngei theihna tura theihtawp chhuahpui turin khawtlang mipui a sáwm.

Baryl Vanneihsangi Tlau pawhin Sialsuk khawtlang a lawmpui thu a sawi a; chawimawina tam zawk dawng thei tur khawpa hma la a, ṭangrual zel turin khawtlang mipui a chah.

Best Tourism Village, Community Based 2024 lawm nan tlaiah khaw-tlangin ruai an ṭheh a ni.