KHAWTHLIR

Thisen pe

Mizoram Home Guards & Civil Defence chuan Mizoram Home Guards din champha vawi 62-na pualin nimin khan Civil Hospital, Aizawl tan thisen unit 85 an pe. Thisen pek hi Mizoram Home Guards Headquarters, Chawlhhmunah buatsaih a ni.

Nasa zawka Home ṭanpui rêl

Mission Vengthlang Presbyterian Kohhran biak-ina Synod Inkhawmpui neih mekah nimin khan nilengin rorel chhunzawm a ni a, moderator Rev. RC Lalnghakliana'n a kaihruai. Nimina rorelah hian general agenda 14 ngaihtuah hman a ni a, an pawm zingah 'Home hrang hrang nasa zawka ṭanpui' chungchang a tel a, Synod Executive Committee bawhzui tura dah a ni.

Airport kawng khar chhunzawm

Sihhmui-Lengpui kawnga Tlawng lei dawh mekah chak zawka hna thawh a nih theih nan kawngpui hi December 10, 2024 thleng khâr chhunzawm a nih thu Aizawl SP Rex Zarzoliana Vanchhawng-in a tarlang. November 30, 2024 thlenga kawngpui khârna thupek Aizawl SP-in October thla khan a lo chhuah tawh a, lei dawh zawh a la nih loh avangin kawngpui hi khar chhunzawm a ni.

Mi ṭanpui nan tlân

Lawngtlai Auto Rickshaw Owners Association chu November 4, Nilaini khan mi dangte ṭanpuina atan an tlân a, Rs 2,04,130 an hmu chhuak. An sum hmuhte chu veng 13-a mi harsa pathum ṭheuh bakah, home leh damdawi-inah hlan an tum a ni.

UPC hruaitu thlang

December 4-5 chhunga Mizoram UPC Executive Committee ṭhukhawm chuan kum 2025-26 chhunga hmunpuia hruaitu turte an thlang. Executive chairman atan Upa F Lalremmawia leh general treasurer atan Rev. Rokhuma te an thlang a; General PYD president atan Upa Dr Zonunmawia leh General LAD president atan C Renghlupuii te an thlang bawk.

Chawngvungi Market

Lunglei High Powered Committee (HPC) vice chairman V Malsawmtluanga, MLA chuan nimin khan Pangzawl khuaa Chawngvungi Market a hawng. Chawngvungi Market hi NABARD Gramaya Vikas Nidhi hnuaiah NABARD, AMFU Welfare Foundation leh Public Asset Committee Pangzawl South-te'n an thawh khawm Rs 31,00,000 hmanga sak a ni a, ṭhutna 30 a awm.

Bank hnathawh thlir

Siaha District Coordination Committee chu nimin khan Siaha additional DC Abraham Beirazi Khithie kaihhruaiin an ṭhukhawm a; July-September, 2024 chhunga Siaha district-a bank hrang hrangte hmalak dan an thlirho. Siaha district-a bank-te zingah IDBI chu Reserved Bank of India-in CD ratio ṭha ni tura a bituk zat hniam ber (60%) pha lo awm chhun a nih thu tarlan a ni a, ṭan la tura chah an ni.