Sangau-Saisihchhuah kawng chungchang Mizoram Rajya Sabha MP-in a sawi chhuak

Nimina Parliament Committee Room-a Development of North Eastern Region (DoNER) Consultative Meeting-ah Rajya Sabha MP K Vanlalvena chuan Sangau leh Saisihchhuah inkar kawng siamna atana DoNER-in cheng vbc 66.08 a pek tawh hnuhkîr leh chungchang a sawi chhuak.

Thu dawn danin, DoNER Consultative Meeting hi DoNER minister Jyotiraditya M Scindia-a'n a kaihruai a; DoNER hnuaia hmarchhak state hrang hranga hmasawnna hna thawhte chungchang thlirho a ni.

K Vanlalvena chuan, kumina Parliament monsoon session neih zawh tâkah August 8-a a zawhna DoNER minister of state Sukanta Majumdar-a'n a chhanna, Myanmar ramri panna Sangau leh Saisihchhuah inkar kawng sialna atana DoNER-in cheng vbc 66.08 a sanction tawh hnuh kîr leh a nih thu a tarlan chungchang a sawi chhuak a ni.

Rajya Sabha MP chuan, Sangau-Saisihchhuah kawng siamna tur sum chu February 10, 2021-ah DoNER-in North Eastern Council kaltlangin sanction order a tichhuak a, hna thawktu atan Mizoram PWD thlang loa BRO an thlan zawk avanga harsatna tâwk an nih thu a sawi.

K Vanlalvena chuan, BRO-in Mizoram PWD ruahmanna pawm duh loa Pángkhua paltlanga kawngpui sial an tum avang leh Pángkhua mipuite'n zangnadawmna an phût si avanga project chu kal tluang lo a nih thu te, PWD ruahman ang chuan kawngpuiin khaw chhung a paltlang dawn lo a, zangnadawmnaah harsatna a awm dawn loh thu te, project chu khatih laia chief minister Zoramthanga priority list-a mi a nih avangin sum pek tawh hnuh kîr leh a rem loh thute a sawi bawk.

DoNER minister Jyotiraditya M Scindia chuan, Sangau-Saisihchhuah kawng chungchang chu hun dangah uluk zawka sawipuiah Rajya Sabha MP a sáwm a, a ṭul anga a bawhzui tur thu a sawi a ni.