Thu dik hriat tum turin mipui ngen

Lunglei Municipal Council (LMC) chuan thuchhuah siamin, Krismas leh kumthar vuakvêta veng/kâwn chei leh Krismas bazar chungchanga tun hnaia thuthang chu pawi an tih thu tarlangin, thu dik hriat tum turin mipui an ngen.

LMC chuan, December 2, 2024-a LMC Special Board of Councillors ṭhutkhawmah Krismas leh kumthar vuakveta kâwn/kawtthler chei ṭha vengte LMC anga lawmman siamsak chungchang an ngaihtuah tih an tarlang a ni.

LMC chuan, "Ngun taka ngaihtuah a nih hnuah kuminah chuan a hun a teptêr tawh avang leh veng tam zawkah kâwn chei mumal taka kalpui a nih rih bawk loh avangin LMC anga lawmman siama hmalak chu tih rih loh ni se, nakkum 2025 atan zawk ruahmanna siam a, kâwn/kawtthler chei ṭha vengte lawmman inpek ve ngei ni tawh se, tiin a rêl a ni," a ti a; mimal, pawl leh veng ṭhahnemngaite'n an mahni sensoa an lo cheite chu ṭha an tih thu leh lawmawm an tih thu an tarlang.

Krismas bazar chungchangah, October 23, 2024-a Lunglei district-a sorkar department hrang hrangte leh local council/association aiawhte nen Krismas bazar siam loh rel a nih thu tarkangin LMC chuan, "Kumin bik atan chuan Krismas bazar siam loh ni se tia thu awm tawh chu kan pawmpui a ni. Chanchin thar leh social media-ahte thu inhlan leh dawnsawn sual palh avanga thu dik lo lêng vel awm hi LMC chuan pawi a ti tak zet a, thu dik leh nihna zawk hre fiah turin mipuite kan ngen a ni," an ti.