Kângmei vanga zangnadawmna pek theih zirho

Hnahthial District Disaster Management Authority (DDMA) leh Village Level Disaster Management Committee (VLDMC) member-te nimin khan an ṭhukhawm a, district bawrhsap Rita Lalnunmawii Pachuau'n a kaihruai. Kângmei vanga zangnadawmna pek theihte zirho a ni.

Ṭhutkhawmah hian Hnahthial SDO Esther Lehlang-in kângmei vanga chhiatna tuartute hnena zangnadawmna pek theih dan a sawifiah a; dan phal loh thil tih vang emaw, tih luih vang emawa kângmei tichhuaktute chu zangnadawmna pek an nih loh thu leh, dan anga hrem theih an nih thu a tarlang.

Hnahthial DC chuan, ṭhál laiin kângmei chhuak thei lakah fimkhur a ṭul thu sawiin, "Kângmei vanga chhiatna a thlen hian zangnadawmna dawn theih (relief fund) a beitham ṭhin avangin kângmei chhuahtir loh hram hi duhthusam a ni," a ti a; kângmei laka mipui an fimkhur theih nan khaw tina VC-te chu a theih ang anga hma la turin a chah.

VC-te chu an khuaa kângmei leh chhiatna a thlenin a rang thei ang berin sorkar official-te hriattir turin Bawrhsap chuan a chah a; Krismas leh kumthar thleng turah mipuite'n nuam leh ralmuang taka hun an hman ṭheuh theih nan YMA nen ṭangruala duty post siam turin khaw tina VC-te a ngen bawk.