Hnahthialah Human Rights Day hmang

Hnahthial District Hub for Empowerment of Women (DHEW) leh One Stop Centre chuan nimin khan '16 Days Global Awareness Campaign on Ending Gender Based Violence' kharna hun DC conference hall-ah an hmang a, Human Rights Day hman nghal a ni.

He hunah hian One Stop Centre administrator Teresa Lalhruaitluangi'n '16 Days Global Awareness Campaign on Ending Gender Based Violence' kaltlanga hmalaknate a tarlang a; GBV Global Awareness Campaign puala poster siam intihsiak result puan a nih bakah, lawmman sem a ni.

Inkhawm hi Hnahthial DC Rita Lalnunmawii Pachuau-in a hmanpui a; thu sawiin, "Mizoram hi India ram state dang ngaihtuah chuan hmei­chhiate dinhmun chu ziaawm viauin lang mah se, rolrelna hmun sang ber Assembly House-ah ṭhu an awm mang lo hian hmeichhiate din­hmun a tilang chiang a, hmeichhiate'n politics an luhchilh nasat a ngai," a ti.