Holistic Rural Development Project

Society for Action in Community Health (SACH), New Delhi-in Lungsen RD Block-a Holistic Rural Development Project (HRDP) an kalpui tur chungchangah nimin khan Lunglei bawrhsap Navneet Mann leh SACH hotute an inkâwm.

HRDP hi kum thum chhung kalpui tur niin, sum senso tur hi HDFC Bank-in CSR hnuaiah an tum dawn a; Lungsen RD Block chhunga khaw 10-ah kalpui a ni ang.

Project bul ṭanna atana thil ṭul hrang hrang - office hmun tur ruahman, hmalakna tur khua tlawh, khawtlang hruaitute leh mipui nena inkawm leh project kalpui tura hunbi leh hmachhawp ruahman felte chu tun ṭuma an lo kal chhan a nih thu SACH hotute chuan Lunglei DC an hrilh.

HRDP hnuaiah hian thiamthil inzirtir leh mipui khawsak chawikan te, thei leh thlai chìn lama hmalak te, sumdawnna lam tihhmasawn te, hriselna leh faina lama hmasawn te, nizung chakna hman ṭangkai te, zirna-in leh anganwadi tihchangtlun te, khawtlang thawhhona tihchak leh sum leh pai enkawl thiamna inzirtirnate kalpui tum a ni.