ZPM MLA-te'n thlangtu an phatsan lo - Val Upa Council

ZPM Val Upa Council (VUC) chuan, ZPM MLA-te'n anmahni thlangtu mipui an phatsan loh thu leh, Assembly Speaker-in MLA aṭanga Lalduhoma a bàn chu an dem tak zet thu an tarlang.

ZPM VUC member-te chu nimin khan an ṭhukhawm a, ZPM Legislature Party leader Lalduhoma, MLA aṭanga bàn a nih chungchang an sawiho. Thuchhuah siamin, "ZPM MLA-te hian party emaw, thlangtu mipui an phatsan hauh lo. Speaker-in Pu Lalduhoma, MLA a nihna aṭanga a chawlhtir hi ama mimal huphurhna leh îtsîkna avang ni ngeiin kan hria a, Speaker thil tih dan kan dem tak zet a ni," an ti.

Lalduhoma leh ZPM candidate dangte'n kum 2018 inthlan an chuh laiin ZPM chu political party anga din a ni tawh tih sawiin VUC chuan, "Manifesto mumal tak leh common symbol pawh a nei. Mahse, khatih lai khan ZPM chu party ding hlim a ni a, registration leh recognition a la nei hman lo. Hei vang mai hian independent anga an chuh a ṭul a, mahse, ZPM political party candidate an ni," an ti a; VUC hmaah ZPM-a rinawmna thu an tiam thu an sawi.

Val Upa Council chuan, ZPM MLA-te chu inthlan dawna an dinhmun leh tuna an dinhmun a la ngai reng thu te, anti-defection danin a tum leh siam a nih chhan, Statement of Objects and Reasons-in a sawi chu uire/phatsan (defection) khap a nih thute an tarlang bawk.