Aizawlah International Conclave cum Buyer-Seller Meet buatsaih

Mizoram sorkar leh Agricultural and Processed Food Products Export Development Authority (APEDA) chuan nimin khan Baptist Multipurpose Centre, Aizawlah 'International Conclave cum Buyer-Seller Meet (BSM) - To boost agricultural exports from Mizoram' an buatsaih a, Commerce & Industries minister F Rodingliana'n hmanpuiin, exhibition a hawng.

International Conclave cum Buyer-Seller Meet-ah hian Russia, Oman, Azerbaijan, Nepal, Jordan, Bahrain, Ethiopia, Saudi Arabia, Singapore, Bhutan aṭangin company (buyer) 14 leh India ram chhunga company buyer 31 an tel a; Mizoram aṭangin kut hnathawktu mi 100 vel an tel bawk.

Mizorama thar leh siam chhuah thil chi hrang hrang pho chhuahna stall pakua leh District Agricultural Marketing Committee (DAMC) stall 11 siam a ni a; vawiinah chhunzawma zawh a ni ang.

Minister F Rodingliana chuan, Mizorama thlai thar tam tak chu leiṭha (fertilizer) tel lo a nih thu leh a hrisel bik thu sawiin, "Mizoram hian sumchang thlai thar theihna ram a nei ṭha a, vawiina buyer lo kal zawng zawngte kan kut hnathawktute thawhpui a, hlawk zawka an thlai tharte an hralh theih nana puitu ni turin ka ngen cheu a ni," a ti a; Conclave chu kut hnathawktute leh Mizoram tan hmasawnna bung thar kaina a nih a beisei thu a sawi.

F Rodingliana chuan, chief minister Lalduhoma'n tun hma aṭanga kut hnathawktute'n an thawh rah an seng theihna tur hmathlir a lo neih tawh chu sorkarna an siam hnuah a taka kalpui mek a nih thu a sawi a, "Sorkarin kut hnathawktute chu Mizorama hmasawnna tura innghahna bulṭhut an ni tih hi a ring tlat a, aieng, sawhthing, Mizo hmarcha leh hmunphiahte chu ngaih pawimawh hmasakah a nei a ni," a ti.

International Conclave cum Buyer-Seller Meet-ah hian chief secretary Khilli Ram Meena, Ministry of Commerce economic adviser Dr C Vanlalramsanga, APEDA chairman Abhishek Dev, general manager Vinita Sudhanshu leh hotu dang te, Spices Board director Dr AB Rema Shree, CRISIL senior research analyst Saravanan P leh Mizoram Agriculture Marketing Board managing director Lalhmingmuana ten thu an sawi.

Mizoram Agricultural Marketing Board Managing Director tarlan danin, Mizoram district hrang hrangah primary society 795 a awm mek a; kum 2025 chhungin sawhthing qtl. 14,87,000, Mizo hmarchatê qtl. 44,700, hmunphiah qtl. 99,500 leh aieng qtl. 78,800 thar beisei a ni.

Chawhnu lamah India ram chhung leh pawn aṭanga company/buyer-te leh thlai thartute tan inkawmhona hun buatsaih a ni.