Paragliding Accuracy Championship & Airsports Festival chhim turin mipui sáwm
Tourism department leh Mizoram Aero Sport Association (MASA) chuan December 9-14, 2024 chhung khian Bawngchawm, Serchhipah International Paragliding Accuracy Championship & Airsports Festival 2024 FAI (Federation of Aeronautique Internationale) Category-II an huaihawt dawn a, chhim turin Mizoram mipui an sáwm.
Paragliding Accuracy Championship & Airsports Festival buatsaih tur chungchangah hian Tourism minister Lalrinpuii chuan nimin khan a pisaah thuthar thehdarhtute a kâwm a; India rama aerosport competition lian ber tura ngaih a nih thu sawiin, "A lawmawm ka ti a, mipui pawhin an ngaihhlut ve hle ka ring. Adventure tourism hi theihna kan neihna ni dawnin a lang," a ti a, buatsaih chhoh zel a nih chuan eizawnna ṭha zawk siam theihna a nih a beisei thu a sawi.
Minister sawi danin, Paragliding Accuracy Championship & Aero Sports Festival-ah hian paraglider tel tum inziak lut mi 79 an awm tawh a, mi panga tih loh chu Mizoram pawn lam mi vek an ni. Tel tur zingah Saudi Arabia, Kosovo, Albania, South Korea, Spain, Singapore, Malaysia, Indonesia, Mongolia, Nepal leh Kazakhstan ram mite pawh an tel.
Lalrinpuii chuan, Festival chhungin mipui tan paragliding joy ride te, hot air balloon joy ride, nghakuai chiah leh air rifle shooting te, zan lamah concert-te buatsaih a nih dawn thu sawiin, chhim turin Mizoram mipui a sáwm a ni.
Zawhna chhangin Lalrinpuii chuan, Paragliding Accuracy Championship & Aero Sports Festival atan hian state sorkar aṭangin cheng nuai 73 an hmuh thu a sawi bawk.
Tourism minister Lalrinpuii chuan, paragliding chu Mizoramin tourism lama hma a lakna zingah world map-a lan theihna remchang ber a nih thu sawiin, "Sum sên tur kan neih loh laiin Chief Minister, Finance Minister ni bawkin tourism lama hmasawnna awmze nei kan bawhzui theih nan sum mamawhte min ngaihtuahsak a, lawmawm kan ti hle," a ti.
Tourism Minister sawi danin, December 9-14, 2024 chhunga International Paragliding Accuracy Championship & Aero Sports Festival-ah hian paraglider tel tum inziak lut mi 79 an awm tawh a, mi panga tih loh chu Mizoram pawn lam mi vek an ni. Tel tur zingah Saudi Arabia, Kosovo, Albania, South Korea, Spain, Singapore, Malaysia, Indonesia, Mongolia, Nepal leh Kazakhstan ram mite pawh an tel.
Lalrinpuii chuan, December 16-21, 2024 chhungin Lammualah Winter Festival buatsaih a nih dawn thu a sawi a, "Festival-te hi ruihhlo lama inzirtirna atan platform ṭha tak a ni tih kan hmu chhuak. Ṭhalaite hian thianghlim leh felfai tak chunga hlim kan zir a ngai a, chu chuan changkanna nasa tak min thlen dawn a ni," a ti.
Tourism Minister sawi danin, Winter Festival hi December 16-ah hawn a ni ang a, intihhlimna chi hrang hrang leh ei leh in turte a awm ang a, zan lamah concert buatsaih ṭhin a ni dawn a, luh man awm loin a duh apiangin chhim theih a ni. A tawp zan, December 21 zanah Secondhand Serenade-in hun an hmang dawn a, hetah hi chuan luh man a awm dawn thung.
Winter Festival pualin December 17-ah Hmuifang tlangah Kite Festival buatsaih a ni dawn a, zan lamah Leikapui Zan hman a ni ang. December 19-ah Reiekah Arkaiden Zan hman a ni dawn bawk.