Sainik School-in Annual Day an hmang

Sainik School, Chhing-chhip chuan nimin khan an hmunah Annual Day vawi 8-na an hmang a, chief minister Lalduhoma khuallian a ni. Minister leh bialtu MLA PC Vanlalruata leh MLA Lt.Col. Clement Lalhmingthanga ten an hmanpui bawk.

Chief Minister chuan, Sainik School chu India rama sikul ṭha pawla ngaih a nih thu leh zir chhuak tawh zingah mi hlawhtling leh ropui tak tak an tam thu a sawi a, "Chhingchhip Sainik School pawh kan beisei sang hle. Mizoram sorkarin kum tin he sikul hi grant tam tham tak a pe ṭhin a, he sikul tana kan insennate hi investment-ah kan ngai a ni," a ti.

Sainik School, Chhingchhip chu India rama Sainik School zinga hmeichhe luhna hmasa ber a nih avanga a lawm thu sawiin Lalduhoma chuan, "Zirna pangngai bakah infiamna lamah te, culture & tradition lamahte in ti ṭha ṭhin hle tih kan hria a ni," a ti a; naupangte theihna ropui tak tak a hmu chuan a tihhlim thu a sawi.

CM Lalduhoma chuan, zirlaite chu Sainik School-a an zir theih avanga an vanneihzia hre tura chahin, "Theihtawp lo chhuah zel ang che u. A ṭha thei ang berin in zir chhuak dawn nia. Mizoram leh India hian lehkhathiam, kan ram leh hnam tana mi ṭangkai kan mamawh," a ti a; zirtirtute leh zirlaite chu an kal zelna turah duhsakna a hlan.

He hunah hian zirlaite'n drill demons­tration, gymnastic, martial art, khukri dance leh thil dangte an entir a; Aizawl DC Lalhriatpuia, Serchhip DC Paul L Khuma, Assam Rifles inspector general (east) Maj.Gen. Suresh Bhambhu leh 23 Sector deputy inspector general Brig. Girish Upadhya bakah, Assam Rifles hotu dangte leh zirlai nu leh pate an tel a ni.

Chhingchhip Sainik School principal Lt.Col. Kartik Sood sawi danin, an sikul hi April 2017-ah din a ni a, Sainik School 26-na a ni. Pawl 6-12 zir theihna a ni a, zirlai 388 awm mekin, mi 52 chu hmeichhia an ni a, Sainik School zinga hmeichhia luh theihna hmasa ber a ni.

India ramah Sainik School 33 a awm mek a, Ministry of Defence hnuaia Sainik School Society-in an enkawl niin, naupang pakhat tan kum khatah Rs 2,00,000 vel sen a ngai.