VC term pawh tawi a nih avangin sorkar khinna tur court-ah thehlut

All Mizoram Village Council Association (AMVCA) chuan VC hun (term) tihtawi a nih avangin nimin khan Gauhati High Court, Aizawl Bench-ah Mizoram sorkar an khinna tur an thehlut.

Vanglaini thu dawn danin, AMVCA hian ukil ruaiin, an president K Lalngaizuala hoin Mizoram sorkar khinna tur an thehlut a, High Court hian a pawm dawn leh dawn loh hriat a la ni lo. High Court chuan chawlhkar thar lamah AMVCA thu thehluh kalpui zel dan tur a tihfel rin a ni.

Tarlan tawh angin, AMVCA khawmpui November 26, 2024-a neih chuan VC term tihtawi a nih avangin Mizoram sorkar khin an rêl a, hemi atan hian VC tinin Rs 500 ṭheuh an thawh.

AMVC hruaitute chuan, an term pawh tawi hrim hrim vanga court-a kal an ni lo tih an sawi a, "Mipui thlan VC-te zahawmna humhim kan duh. VC lo la ni leh zel turte tan pawh duh duha tih an nih lohna atan VC zahawmna humhim ṭul kan ti. Kan term pawh tawi ringawt hi min thlang tlingtu mipui zah lohna a ni," an ti.

Hetih lai hian, chief minister Lalduhoma chuan ZPM Southern Hqrs Office, Lungleia thu a sawi ṭumin, February 2025 chawhnu lamah chuan VC inthlan buatsaih tura ruahman mek a nih thu a sawi a, "VC term kal mek hi Covid avang khan pawhsei a ni tawh a, a ṭul hunah sorkar chuan a pawt seiin a pawt tawi thei, hei hi sorkar thuneihna a ni," a ti.

Tun hma pawhin VC hun pawh sei leh pawh tawi a lo awm tawh ṭhin thu sawiin Chief Minister chuan, "Thuneitute thuneihna a ni. Court-ah kan khing dawn tih thâwmte kan hria a, an buai peih chuan min khing se," a ti a, sorkar tan chuan buaina tur a awm loh thu a sawi a ni.