Synod-in ruihhlo ti lote ruihhlo laka veng tura hmalak an rel

Synod Inkhawmpui vawi 101-na Mission Vengthlang Kohhran biak-ina neih mek chu nimin khan chhunzawm a ni a; ruihhlo ti lote ruihhlo laka ven kawnga hmalak an rêl a, Synod Executive Committee (SEC) bawhzui turin an dah.

Synod hnuaia thawkte nau neih chawlh (maternity leave) tihpun rawtna pawmin, maternity leave chu ni 180 ni tawh turin an rêl a, kum 2025-ah hman ṭan a ni ang. Naupangte thuawih zirtir chungchang rawtna an pawm bawk.

Synod Inkhawmpuiah hian nimin khan general agenda an rêl zo tawh a; vawiinah rorel chhunzawm tur niin, SEC leh board aṭanga thu lutte an rêl ang. Inkhawmpuiah hian naktuk Pathianni chawhmaah pastor nemngheh leh probationary pastor dahngheh inkhawm neih a ni dawn a, zanah a ṭiak ang.