Zote khuain kum 125-na an lawm

Champhai Zote khua chuan nimin khan an khaw community hall-ah an khaw kum 125 tlin an lawm a, khuallian minister K Sapdanga, Zote khaw chhuak zinga minister hmasa ber hnenah chawi­mawina an hlan.

K Sapdanga hi Zote khua aṭanga minister hmasa ber a nih avangin chawimawina atan lungphun an siam a, Champhai bawrhsap VL Remliana’n a hawng. Champhai Zote kum 125 tlin lawmna lungphun chu K Sapdanga'n a hawn bakah, souvenir a tlangzarh. Bialtu MLA H Ginzalala'n kum 125 tlin lawmpui nan pawisa a hlan bawk.

Home Minister chuan, Zote khaw rama Industrial Training Institute (ITI) building chu Myanmar aṭanga rawn raltlante awmna atan hman a nih thu a sawi a, "Champhai Sub-Headquarter YMA-in relief camp tur hmun dangah an buaipui mek a, peih a nih ve leh ITI hi hman ṭangkai nghal a ni ang," a ti.

K Sapdanga chuan, a pian leh sei lenna Zote khuain kum 125 hmel an hmu ta chu a lawm tak zet thu sawiin, "Hun hmasa lam ngaihtuah chuan in leh lo leh a chhunga chengte pawh kan changkang tawh hle a ni," a ti a; zirna, eizawnna leh infiamnaahte hma an sawn theih nan sorkarin hma a la zel tih sawiin, sorkar hmalakna hlawhtlinpui leh chhawr nasa khua nih tum turin Zote mipui a chah.

Zote kum 125 tlin lawmna hi VC president PC Rodawla'n a kaihruai a ni.