Sorkar laipui leh Mizoram sorkar Education Minister-te an inkâwm

Education minister Dr Vanlalthlana chuan December 5, Ningani khan New Delhi-ah a department enkawl pahnih kaihhnawihah Union Education minister Dharmendra Pradhan chu a pisaah a kâwm.

Sorkar thuchhuah tarlan danin, Dr Vanlalthlana hian Union Minister hnenah hian Mizorama Pradhan Mantri Schools for Rising India (PMSHRI) sikul neih belh a ṭul thu te, Mizoram Engineering College chungchanga Mizoram sorkar hmalak dan te, Samagra Shiksha zirtirtu hlawh chungchang leh sorkar laipui aṭanga programme hmang tura tih tam lutuk chu tihtlem a ṭul thute a thlen.

National Institute of Technology, Lengpui campus-a state sorkarin harsatna a tawh leh Mizoram sorkarin forest clearance a neih loh avanga penal interest chawi tur cheng nuai 200 vela an tihhniam chungchang Ministry of Environment, Forest and Climate Change lama ngaihvenpui tura a duh thute a thlen bawk.

Mizoram Education Minister leh Union Education Minister inkawmna avang hian CSR kaltlangin Mizorama sikul ṭhenkhatah science, technology, engineering and mathematics (STEM) laboratory neih a ni dawn a; hei hi academic session thar aṭanga hman theih tura beisei a nih thu sorkar thuchhuahin a tarlang.

Minister Dr Vanlalthlana hi School Education secretary David Lalthantluanga leh Samagra Shiksha Mizoram state project director C Lalthanzira ten an ṭawiawm a ni.