Hripui lakah Dawrpui an fihlîm Dintharah +ve pakhat a la awm

Aizawla veng (local council) zinga Covid-19 vei tamna ber zinga mi, Dawrpui vengah nimin aṭang khan hripui vei vanga enkawl lai an awm tawh lo a, hripui vei tawhte an chhuak kim tawh. Hripui vei tamna ber veng nia hriat Dinthar vengah pawh hripui vei mek mi pakhat chiah a awm tawh bawk.

Dawrpui Local Task Force tarlan danin, Dawrpui veng mi, Covid-19 hripui vei enkawl zinga chhuak hnuhnung ber Remruatfela (11) chu nimin khan Durtlang BSUP CCC aṭangin a chhuak a, amah awmpuitu a ú pawh a negative bawk. Heti hian Dawrpuiah Covid-19 positive an awm tawh rih lo.

Dawrpui veng hi October 6, 2020 aṭangin Covid-19 vei nei loa an awm lehna hmasa ber a ni a; October 6-a hripui vei hmuh chhuah chu Aizawlah hrî kài ṭanna hriat mai theih loha hripui vei an awm ṭanna pakhata sawi a ni. Dawrpuia hripui vei hmuh tawh zat chu mi 61 an ni a, an zinga pakhat - Lalsangkhuma (66) erawh chu October 28, 2020-ah a thi a, Covid-19 vanga Mizorama thi hmasa ber a ni.

Dawrpuiah hian Covid-19 positive hmuh an tam tham avangin hmun ṭhenkhat lai chu containment zone-ah puan a lo ni tawh bawk.

Hetih lai hian, village council/local council mala Covid-19 vei tamna bera ngaih Dinthar vengah pawh nimin tlai dinhmun ang chuan Covid-19 positive pakhat chauh a awm tawh a, enkawlna hmuna la awm erawh chu pahnih an ni.

Dinthar khawtlang hruaitute hnen aṭanga thu dawn danin, Dinthar vengah hian Covid-19 hripui kái hmuh chhuah zat chu mi 89 an ni a, nimin tlai thleng khan mi 87 an chhuak tawh. Mi pahnih, nupa chu SRH-ZMC-ah an la awm a, nu zawk chu a negative tawh a, a pasal a la positive avangin a la awmpui a ni.

Dinthar vengah Covid-19 positive hmuh chhuah an tam avangin Aizawl DC chuan, November 9, 2020 khan veng pumpui chu containment zone-ah a puang a, hripui vei an tlem tawh avangin containment zone a nihna chu December 1, Thawhlehni khan Bawrhsapin a hlîp. Ni 23 chhung luh leh chhuah phal lohna hmun a nih avangin an veng chhungkaw khawsak harsa mi 675-te Rs. 1,000 ṭheuha pek turin Chief Minister's Relief Fund aṭangin Rs. 6,75,000 pek a ni bawk.