Holistic Rural Development Project sawiho

Lunglei DC Navneet Mann hoin nimin khan DC conference hall-ah Lungsen RD Block-a Society for Action in Community Health (SACH), New Delhi kaltlanga Holistic Rural Development Project (HRDP) kalpui dan tur sorkar hotute leh SACH hotute'n an sawiho a, March 2025 hmaa hmalakna tur ruahmanna pathum an siam.

Lungsen RD Block-a HRDP hmalakna kalpuina atan hmun 10 - Lungsen-I, Lungsen-II, Rângte, Chawngte-L, Lungrâng South, Rualalung, Upper Lungrâng, West Rotlang, Chhûmkhûm leh Phairuangkai te thlan a ni.

Ṭhutkhawmah hian March 2025 hmaa hmalakna tur ruahmanna pathum an siam a; January 2025 chhungin hmun 10 thlanahte hian street light 15 ṭheuh dah tum a ni. February 2025 chhungin Lungsen-I, Lungsen-II, Rangte, Chawngte-L leh Lungrang South-ahte sikul pakhat ṭheuh chei ṭhat tum a ni a; March 2025 chhungin Lungsen I-ah anganwadi centre pakhat chei ṭhat tum a ni bawk.

Sikul leh anganwadi centre chei ṭhat tur chu a kaihhnawih department-te nen inrâwn tlânga la thlan tur a ni dawn a; April 2025 aṭanga March 2026 chhunga hma lakna tur ruahmanna pawh DC leh line department-te nen inrâwnin buatsaih leh tur a ni.

Lunglei district-a Lungsen RD Block chu aspirational block a nih angin hmasawnna huapzo leh tluantling a awm theih nan Lunglei district thuneitute'n sorkar ruahmanna kaltlanga hna thawh tur bakah, pawn lam aṭanga hma lakpuitu tur an dap. Chumi aṭang chuan SACH-in Lungsen RD Block-a khaw/hmun 10-ah thla 36 (kum thum) chhung atan HRDP kalpui turin ruahmanna an siam a; sum senso tur chu HDFC Bank-in CSR aṭangin an tum dawn a ni.