Zofest-ah 'Zo ze chawi ni' hmang

West Phailenga MZP buatsaih Zofest-ah nimin khan 'Zo ze chawi ni' hman a ni a, Assembly deputy speaker Lalfamkima, adviser to CM Dr Lorrain Lalpekliana Chinzah leh T Lalhlimpuia, MLA ten an hmanpui.

Khuallian Lalfamkima chuan, Zofest thupui 'Hrui khat vuanin' tih chu Zo hnahthlakte inunauna ṭha zawk awm theih nan a pawimawh thu a sawi a, "Zo fa hnam pêng hrang hrang he hun chhima lo kal zawng zawngte hian kan inpumkhatna kawngah hma kan sawnpui ngei ka beisei," a ti.

Lalfamkima chuan, Mizo pi leh pute an taima em em tih sawiin, "Chhungkua leh khawtlang tana mi ṭangkai nih an tum tlat ṭhin," a ti a; rinawmna leh aia upa zahna chu ṭhangtharte'n an chhawm nun zel a ngaih thu a sawi.

Dr Lorrain Lalpekliana Chinzah chuan, "Kan unau hmun hrang hranga awmte'n harsatna an tâwk mek a, Mizorama awmte hian theihtawp chhuaha kan lo kuangkuah a, kan puih an ngai tak zet," a ti a; T Lalhlimpuia pawhin, "Inpumkhatna leh inunauna hi thil pawimawh tak a ni a, hemi kawngah hian tih tur pawimawh tak kan nei vek a ni," a ti bawk.

Zofest 2024 hi nizan khan a ṭiak a ni.