BJP MLA-te'n Union Minister an kâwm

Mizorama BJP MLA pahnih Dr K Beichhua leh K Hrahmo bakah, Mara Autonomous District Council-a chief executive member M Laikaw te chuan nimin khan New Delhi-ah Union Finance minister Nirmala Sitharaman an kâwm a, sum leh paia Mizoram harsatnate leh a chhâwk zângkhaina atana rawtna an neihte an sawipui.

BJP hotute tarlan danin, Mizoram BJP palaite chuan Mizoramin sum dinhmun siamṭhat tuma harsatna hrang hrang a tawhte chu lo hriatpui tur leh, state dangte hmasawn ruala Mizoramin ke a pên ve theih nan theihtawp chhuahpui turin Union Finance Minister an ngen a ni.

Nirmala Sitharaman chuan, April 2024-a Siaha a tlawh ṭuma special package cheng vbc. 75 an dil chungchangah Siaha district chu Mizoram kilkhawr tak, inkalpawhna ṭhat lohna hmuna awm a nih avangin dâwm kân an ngai tih a hriatpui thu a sawi a; special package pek ngei a tum thu sawiin, Ministry of Finance-a official-te chu a ṭul anga lo bawhzui turin a hriattir nghal.

MLA pahnih leh MADC CEM-te hian nimin vek khan Assam chief minister leh NEDA convenor Himanta Biswa Sharma pawh Union Finance Minister pisaah an kâwm nghal a, hmarchhak state-a political development hrang hrangte an sawipui a ni.