KHAWTHLIR

HDFC-in thisen

HDFC Bank chuan nimin khan hmun pathumah thisen unit 44 an pe a, petute mipa 34 leh hmeichhia 10 an ni. Civil Hospital, Aizawlah mipa 16 leh hmeichhia pathumin unit 19 an pe a, Lunglei Civil Hospital-ah mipa 10 leh hmeichhia pakhatin unit 11 leh Kolasib District Hospital-ah mipa pariat leh hmeichhia parukte'n unit 14 an pe bawk.

Quarry neitute'n DC-ah an thlen

Mizoram Quarry Association hruaitute chuan November 5, Ningani khan Aizawl bawrhsap Lalhriatpuia a pisaah an kâwm a, quarry permit nei si loa lung hàlna hmanrua, sumdawnna atana hmang an awm thu an thlen. Mizoramah explosive zawrh phalna licence nei pakhat chauh a awm thu an thlen bawk.

Minister-in tlawh

Animal Husbandry & Veterinary minister C Lalsawivunga chuan nimin khan Bung Banglaa JB Foundation din ran chhan chhuahna leh enkawlna Animal Shelter leh Zemabawka JB Paws Veterinary Hospital a tlawh. Minister chuan, JB Foundation-in ran baihvai leh tuamhlâwm ngaite enkawlna hmun changtlung zawk an siam theih nan CSR fund buaipui turin hma lakpui a inhuam thu a sawi.

Minister-in hmanpui

Minister Pu PC Vanlalruata chuan December 5, Ningani zan khan West Phailengah MZP buatsaih Zofest a hmanpui. Minister chuan, ṭhenawm state-te nen inlungrual taka awm leh inunauna chhawm nun zel a pawimawh thu sawiin, "Zo hnahthlakte insuihkhawm a, râlmuang taka kan awm tlan zel theih nan hmalak zel a ni," a ti.

Saikuti Hall Managing Committee

Saikuti Hall Managing Committee chuan nimin khan an chairman Navneet Mann, Lunglei bawrhsap kaihhruaiin Lunglei Municipal Council kuta Saikuti Hall hlan chhawnna tur ruahmanna (terms & conditions) an thlir ho a; ruahmannate chu siamṭhat ngai laite siamṭhat niin, remchang hmasaah uluk zawka la thlir ho leh ni se, an ti.