Assam Rifles-te'n April 2025-ah Aizawl an chhuahsan vek dawn - Chief Minister

Chief minister Lalduhoma chuan, Assam Rifles-in Aizawla battalion hmun chu April 2025-ah an chhuahsan vek dawn thu leh, AR chhuahsan hmun humhalh leh hman dan tura Mizoram sorkarin dan a lo siam tawh chu siamṭhat a nih dawn thu a sawi.

CM Lalduhoma hian December 7, Inrinni zing khan AR ram chhunga Centre for Environment & Social Justice (CESJ)-te thing chhiarpui leh zirchianna, 'Tree Inventory & Carbon Storage of Assam Rifle Campus, Aizawl, Mizoram' tih lehkhabu a tlangzarhnaah AR insawn dan tur a sawi a ni.

Lalduhoma chuan, "AR-te hian chhuahsan loh tur pahnih an nei a, chu chu DIG Quarters leh Khatlaa AR Range hmun hi a ni a, hengte hi a tir aṭanga tel lo a ni. Hemi pahnih tih loh hi chu nakkum April thlaah a vaiin an chhuahsan vek dawn," a ti.

Hmun pathum - Chite, AR kohhran biak-in hmun leh Babu­tlanga an hmunte chu January 2025 chhunga chhuahsan tur a nih thu sawiin CM Duhoma chuan, "An chhuahsan tur hi tute'n emaw min chuh ang tih kan hlauh avangin a vai hian survey neih ṭhat leh vek ni se kan ti," a ti a; an chhuahsan hmasak tur hmun pathum chu Revenue dept. leh AR-te'n joint survey an zawh tawh thu a sawi.

Lammual leh a chhehvela AR hmun zawng zawng chu April 2025-ah chuan an chhuahsan vek tawh dawn tih sawiin Lalduhoma chuan, "Tuna battalion awm mekte hi an chhuak ang a (Mizoram aṭangin an chhuak dawn), battalion thar an rawn lut dawn a, battalion rawn lut thar turte chu helaiah rawn kal tawh loin, direct-in Zokhawsang an pan nghal tawh ang," a ti.

Chief Minister chuan, AR chhuahsan tur ramah in tam tak a awm thu sawiin, "Ṭhenkhat chu rei tak tak tawhte a ni a, Quarter Guard hi heritage-a vawn zui kan duh dawn. Building tam tak hi ṭhiah mai a ni dawn lo a, Mizoram sorkarin a phû tâwkin kan lei dawn a, a man kan pe dawn," a ti a, a man erawh tlâwm tê tê a nih dawn thu a sawi.

Chief Minister sawi danin, AR-in an chhuahsan tur zinga mi Zodin Square-a mandir leh War Memorial hmun leh Lock House (Battalion Commandant quarters) hmunte chu survey zawh a ni tawh. Lammual leh a chhehvelte survey mek a ni a, encroachment tamna a nih avangin AR-in an chah chhuah Delhi aṭanga mithiam rawn kalte nen survey tih mek a ni. Chumi zawhah Quarter Guard tlang chu a hranpaa survey leh tur a ni. Khatla lama AR hmunah pawh joint survey tih tum a ni bawk.

Aizawl laili aṭanga AR an insawn chhuah theih nan state sorkarin tih tur pathum a neih thu sawiin CM Duhoma chuan, "Kan tih turte chu tui, power supply leh kawng a ni. State sorkar koa innghat ve a nih avangin chhuanlam siam nan an hmang ang tih kan hlauh avangin kan vil char char a, kawng pawh kan siam mek... theihtawp kan chhuah," a ti a; Mizoram sorkar hmalaknaah AR Inspector General pawhin sawisel tur a nei lo tih a sawi thu a sawi.

Lalduhoma chuan, AR chhuahsan ram venhim, enkawl leh hman dan turah sorkar hmasa lamin dan an siam tawh thu sawiin, "He dan hi a nih ang ang chuan hman tlak a ni tawh lo a, kan tunlai mamawh milin Assembly-ah amendment kan la pass zui tur a ni ang," a ti.