Aikal lâk vanga hrem ngai la awm lo; Voluntary pension dil an awm nual

Department of Personnel & Administrative Reforms (DPAR) chuan aikal lak avanga hrem ngai an awm an la hre lo. Hetih lai hian, sorkar hnathawk zingah voluntary pension dil an awm nual.

Vanglaini palai zawhna chhangin DPAR secretary K Lalthawmmawia chuan, aikal lak avanga hrem ngai an awm an la hriat loh thu a sawi a, "Keini lamah chuan report kan la dawng lo. Department lamin hrem an nei em kan hre lo a, hrem an nei a nih chuan rawn report âwm tak chu a ni," a ti.

DPAR Secretary chuan, sorkar hnathawk zingah voluntary pension dil an awm nual tih sawiin, "Voluntary pension duhte hian anmahni department lamah an dil ṭhin. Aikal lâk khap a nih avanga chhuah dil an ni kher em tih erawh kan hre lo," a ti a, voluntary pension-a chhuak duhte chu dan anga chhuahtir theih an nih thu a sawi.

Aikal lak khapnain zawm a hlawh viaua an hriat thu sawiin K Lalthawmmawia chuan, "Aikal la report dawn kan nei tawh rih lo," a ti.

DPAR-in ruahmanna an siam dan chuan, aikal la report an awm chuan controlling officer-te lakah department proceeding lak tur a ni a; controlling officer-te chu an hnuaia mi aikal la an awm leh awm loh vil tura tih an ni.

Aikal la, an hna zawm thei tawh lote chu chawlh neih zawng zawng an la zo thei a, chumi hnuah pawh pension-a an chhuah theihna dan siam a ni. Pension-a chhuah theih dan chi hrang hrang a awm a, thawk zawm thei lote tan sorkarin kawng a hawng.

DPAR chuan June 19, 2024 khan aikal late chu memorandum tihchhuah aṭanga ni 30 chhungin an hna zawm vek turin a hriattir a; hna zawm lote chu dan loa châwl (unauthorised absence)-ah ngaih an ni dawn tih a tarlang.

Aikal late chungchangah a ṭul anga hma laa bawhzui turin department/office hotute hriattir an ni a; an bawhzui dan (compliance report) chu hriattirna chhuah aṭanga ni 45 chhungin DPAR (ARW)-ah thehlut tura tih an ni.