KHAWTHLIR

Tlangnuam Branch KṬP chuan nimin khan Civil Hospital, Aizawl tan thisen unit 43 an pe a, petute mipa 39 leh hmeichhia pali an ni. Zobawk South Bial ṬKP pawhin nimin khan thisen pek rûnpui huaihawtin, an bial chhunga Zobawk Venglai leh Hlûmte unit-ten Civil Hospital, Lunglei tan Zobawk Venglai Kohhran Sunday School Hall-ah unit 13 an pe a, petute mipa 11 leh hmeichhia pahnih an ni.

Aizawl South-ll MLA Lalchhuanthanga chuan nimin khan a bial chhung, Damvenga leiminin vantlang kawng a tihbal siamṭhat dan tur a en. Kawng bal chu MLALADS hmanga siamṭhat tum a ni. Lal­chhuanthanga hian Sikul­pui hnenah thil dah vawhna (refrigerator) leh white board a pe bawk. MLA hi ZPM Ṭhalai pre­sident Malsawmzuala bakah, block leh unit hruai­tuten an ṭawiawm a ni.

Mizoram Youth Commission (MYC) chuan IAS 2020 full sponsorship state level screening exam an buatsaih dawn a, MYC pisaah dil theih a ni. Dilna chu December 10, 2020 thleng thehluh theih a ni a, December 16-17 chhungin scree­ning exam buatsaih a ni ang.

Deputy chief minister Tawnluia hoin minister 11-te'n nimin khan Covid-19 dona atan Chief Minister Relief Fund (CMRF)-ah November-a an hlawhpui (basic pay) aṭanga 50% (Rs. 40,000) ṭheuh an thawh. CMRF-ah hian nimin tlai thleng khan cheng vbc. 21.91 a lut tawh a, sum la hman loh vbc. 2.33 a awm mek a ni.

State Referral Hospital (SRH)-ah Covid-19 vei mi 25 enkawl mek an ni a, niminah dah luh thar an awm lo. SRH-ZMC Bulletin tarlan danin, ICU-a enkawl ṭhin mi pakhat chu nimin khan Isolation ward-ah sawn a ni a, ICU-a enkawl an awm tawh rih lo. Isolation ward-a awm mi 25 zinga pali chu oxygen pek an ni thung. SRH-ZMC-a enkawl mek zingah hian kum 60 chung lam panga leh kum 14 hnuai lam pathum an tel a ni.