Hmarchhakah theihna a awm - Sports Minister
December 6-8, 2024 chhung khan New Delhi-ah hmarchhak state-te pualin DoNER Ministry-in intawhkhawmna lian, Ashtalakshmi Mahotsav (North East Festival) a buatsaih a; Mizoram aṭanga tel Sports & Youth Services minister Lalnghinglova Hmar chuan, hmarchhakah theihna a awm thu a sawi.
Ashtalakshmi Mahotsav hi prime minister Narendra Modi-in December 6 tlai khan a hawng a, DoNER minister Jyotiraditya Scindia hoin hmarchhak state chief minister-te an tel a, chief minister Lalduhoma a hman remchan loh avangin a aiawhin Lalnghinglova Hmar a tel a ni.
December 7 tlaia sawihonaah Sports Minister chuan, hmarchhak state-ah infiamna lamah theihna a awm thu sawiin, "Tun dinhmunah infiamna lama sum hmuh theihna awm chhun chu Khelo India chauh a ni a, mamawh ang sum hmuh theih a ni lo," a ti a; infiamna lama hmasawnna atan duh khawp a nih loh avangin hmarchhak tana special funding pe turin sorkar laipui a ngen.
Sports Minister chuan, Prime Minister-in India ramah Olympics 2036 nghah a nih theih nan hma a lak thu sawiin, "India ram hian kan thleng thei ngei ang, infrastructure ṭha tak tak pawh kan din thei ang. Mahse, Olympics-ah hian tute nge inel tur ngaihtuah a ngai," a ti.
Lalnghinglova Hmar hian India ramin Olympics a thleng chunga gold medal pakhat mah a la lo a nih chuan thil zahthlak tak a nih dawn thu a sawi a, Prime Minister vision hmangin hmarchhak state tan infiamna lamah special funding pek ngei a rawt a ni.
Sports Minister chuan, hmarchhakah infiamna lama theihna a awm thu sawiin, "Hmarchhak hi infiamna lamah duhsak a ni a, system dik taka infrastructure ṭha nen thuam a nih chuan Olympics-ah hian hmarchhak infiammite'n dinhmun pawimawh tak an luah ngei ang," a ti.
Ashtalakshmi hi India hmarchhak state-te sawina a ni a, Ashtalakshmi Mahotsav-ah hian NE state-te puala hun hman a ni. NE state pariat aṭangin an thlai leh thei tharte leh kut themthiamna hmanga thil siamte pho chhuah a ni a, mithiamte pualin inrâwnkhawmna hun buatsaih a ni.
State hrang hrangte hnam nunphung leh ziarâng hrang hrang entir a ni a, zai, lâm, lemchan, fashion show-te buatsaih a ni a; infiamna lam sawihona hun leh sumdawnna lama inrâwnkhawmna lian thamte a awm bawk.