AR ramah thing chi hrang 480 a awm

Centre for Environment & Social Justice (CESJ)-in Aizawla Assam Rifles ram chhunga thing chhiarpui leh zirchianna, 'Tree Inventory & Carbon Storage of Assam Rifle Campus, Aizawl, Mizoram' tih lehkhabu an buatsaih chu chief minister Lalduhoma'n December 7, Inrinni zing khan Hyve City Hall-ah a tlangzarh. Aizawla AR ramah thing chi hrang 480 a awm tih tarlan a ni.

CESJ bultumin AR ram leh a chhunga awmte chu Mizoram University Forestry department-a research scholar PC Zothanpuii leh Michael Lalramdingliana ten an zir chiang a ni.

PC Zothanpuii tarlan danin, AR ram chhungah hian thing chi hrang hrang 480 an chhinchhiah a, chu'ngte chu species chi hrang 80, family 31 leh genera 59 a ni a; hengte hian carbon dioxide (CO2) 5,766.73 mg/ha vêl a hîp lut anga chhût a ni.

Thing/thlai awm zinga chi 71 chu ei leh in leh ramhmul damdawi atan hman theih a ni a, 14 chu environment thunun theihnaa puitu a ni. Thing 29 chuan nunphung atan hlutna a pe a, pasarih chu ecosystem hnathawh dangte pui thei a ni bawk.

Chief Minister chuan, khawvelin hmasawnna kumhlun (sustainable development) a ngaih pawimawh thu sawiin, "Development eng pawh ti ila, a kumhlun tur a ni a, rei a daih tur a ni. Tehna hrang hranga pakhat chu eco firnedly a ni tur a ni tih a ni a, environment tana ṭha lo a ni tur a ni lo," a ti a; hmasawnna kumhlun zawk a awm theih nan department hrang hrangte project an centralise vek thu leh ram a tihchhiat dan tur an thlir hmasak thu a sawi.

Lalduhoma chuan, hmasawnna hna thawhna turah ramin a hlâwkpui dan tur leh environment bûk thiam a ṭul thu a sawi a, "Hmasawnna kan tih dawn chuan a man kan pek a ngai ve. Kawng nei loin kan awm thei lo a, a man kan pek ngai chin a awm. A dîm thei ang bera kan chet zel a ngai. Chungte chu kan sawiho zel ang," a ti.

CESJ treasurer Saizampuii Sailo kaihhruai lehkhabu tlangzarhnaah hian Environment, Forest & Climate Change minister Lalthansanga leh CESJ working chairman Vanramchhuangi te pawhin thu an sawi.

Vanramchhuangi chuan, CESJ ngaihdanah chuan environment humhalh lam hmasa ber se an tih thu a sawi a, "Hmasawnna hi environment tichhe lo thei ang berin, environment humhimna dante zâwm tlat chungin thawk ila kan duh," a ti,