Chief Secretary-in Champhai a tlawh; Sorkar hotute leh raltlan hruaitute a kâwm

Chief secretary Khilli Ram Meena chuan December 7, Inrinni khan Champhai district-a ráltlante dah khawmna hmun pahnih leh India leh Myanmar ramri a tlawh a, Champhai district-a sorkar hotute a kâwm bawk.

Khilli Ram Meena hian râltlânte awmna Champhai Zote-a ITI building leh Zokhawthara Bethel camp-te tlawhin raltlan hruaitute a kâwm a, an harsatna leh dinhmun a zawt. Chief Secretary hi Champhai bawrhsap VL Remliana, additional SP PC Lalṭanpuia, sorkar official dangte leh YMA Sub-Hqrs hruaitute'n an ṭawiawm a ni.

Sorkar hotute leh tlawmngai pawl hruaitute'n Chief Secretary chu raltlan enkawlnaa an hmalakna hrang hrang leh harsatnate an hrilhfiah a; YMA Sub-Headquarters ruahmannain ITI building-a raltlan awmte chu Champhai Zion Vengah sawn tum mek a nih thu an hrilh bawk.

Champhai Zotea ITI building-ah hian Myanmar raltlan mi 317 an awm mek a, puitling mipa 169, hmeichhia 62 leh naupang 86 an ni. Zokhawthara Bethel camp-ah raltlan 399 an awm a, puitling mipa 110, hmeichhia 177 leh naupang 112 an ni.

Chief Secretary hian Inrinni tlaiah khan DRDO conference hall-ah Champhai district-a sorkar department hotute a kâwm a; Champhai district-a Handholding Scheme kalpui dan te, Myanmar ramri chungchang te, bawlhhlawh sâwngbâwl dan te, African Swine Fever chungchang te, kawlphetha chungchang leh hriak atana sâwr chi thlai chungchangte sawiho a ni.