KHAWTHLIR

Thisen pe

December 7, Inrinni khan KṬP, Sumsuih Bial chuan ZMC tan thisen unit 49 an pe a, petute mipa 44 leh hmeichhia panga an ni a; KṬP, Sakawrtuichhun Bial pawhin Synod Hospital tan unit 43 pein, petute mipa 36 leh hmeichhia pasarih an ni. KṬP, Chhiahtlang Bial pawhin Serchhip District Hospital tan thisen unit 36 an pe a, petute mipa 26 leh hmeichhia 10 an ni. ṬKP, Zobawk North Bial member mipa 24 leh hmeichhia parukte pawhin Lunglei Civil Hospital tan thisen unit 30 an pe bawk.

Rs 1,50,000 hlan

Lunglei Officers' Club member-te'n kumin Krismas puala Lungleia mi rethei leh khawsak harsate ṭanpuina tur an thawh khawm Rs 1,50,000 chu December 7, Inrinni khan Sub-Headquarters YMA, Lunglei hruaitute hnenah a mamawhtute hnena pek turin an hlan.

Heroin man

Champhaia Excise & Narcotics mi leh sate leh Assam Rifles ṭang dun chuan December 6, 2024 khan Champhai Zote leh Ṭiau lui inkarah Keddy Zosangliana (23) s/o Lalbiaknunga leh Lalrinliana (21) s/o Zaitinrema, Tachhip nia inchhálte hnen aṭangin heroin gram 351 an man. Champhai END staff-te hian December 7 vêk kan Champhai Zotlangah heroin gram 303 leh a neitua puh Lalsangzuala (44) s/o R Manlian (L), Champhai Kanan Veng nia inchhâl an man bawk.

Minister-in lawmpui

Lunglei East bialtu MLA Lalrinpuii, minister chuan December 6, 2024 khan a bial chhung Lunglei Ramthar Veng mi Laldinsanga Ramlawt, tun hnaia WBC World Youth Bantamweight champion thar chu a pisaah lawmpuina thuchei leh pawisa a hlan.

Ṭanpuina hlan

Lawngtlai Auto Rickshaw Owners' Association (LAROA) chuan November 4, 2024-a mi dang ṭanpuina atana an service-a an sum hmuh aṭangin nimin khan ṭanpuina an hlan. Lairam Motherless Home hnenah Rs 20,000, Lairam Christian Medical Centre leh Christian Hospital Lawngtlai hnenah Rs 7,000 ve ve leh District Hospital-ah Rs 12,300 an hlan. LAROA hian Rs 2,06,300 an hmu a, an sem bâng chu chhungkaw 40 hnenah Rs 4,000 ṭheuhin an pe leh dawn a ni.

Bawrhsapin tlawh

Lunglei bawrhsap Navneet Mann chuan December 6, 2024 khan Lunglei Civil Hospital a tlawh. Civil Hospital-a thawktute puala buatsaih HIV/AIDS (Prevention & Control) Act, 2017 zirhona a hmanpui a, damdawi-in tihchangtlunna tur rawtnate sawiho a ni. Bawrhsap hian Lunglei Chanmari-a health sub-centre/health & wellness centre tlawh bawk a, thawktute'n an dinhmun leh harsatna an neihte an lo hrilh a ni.

Vawk lak luh khap

Mamit district magistrate K Laltlawmlova chuan thupek chhuahin, Mamit district-ah Mizoram pâwn leh ASF hri lênna district aṭanga vawk leh vawksa aṭanga siamte lak luh khap a nih thu a puang. Ran damlo leh hrisel lo zawrh leh hralh khap a nih thu te, vawk thi chu chinai thi/bleaching powder nen thûk taka phûm tur a nih thu leh, vawk thi a awmin AH&Vety dept-ah hriattir vat tur a nih thute a tarlang bawk.