Mipui rilruah ram siamṭhat duhna a intuh tawh hlein ka hria - Sapdanga

Minister K Sapdanga chuan December 7, Inrinni khan Champhaiah Champhai District Hqrs. BJP president C Lalrosiama leh a thawhpuite ZPM-ah a lawm lut a; mipui rilruah ram siamṭhat duhna a intuh tawh hlea a hriat thu a sawi.

K Sapdanga chuan, ZPM party-in a thlâwna thil sem an tih ve loh avang te, kuthnathawh leh thawhrimna lam an sawi nasat avangin member thar an pung chak lo mai tura an ngaihtuah ṭhin thu a sawi a, "Amaherawhchu, vawiin thlenga ZPM zawm thar mi duhawm tak tak Zoram dung leh vânga an awm reng hian mipui rilruah ram siamṭhat duhna a intuh ta hle niin ka hria a, ka lawm hle," a ti.

Kalphung thar zawm duhtu an pung zel tih sawiin Sapdanga chuan, "India rama roreltu chu BJP an ni a, party hausa tak an ni. BJP District Headquarters hruaitu nih pawh mi ṭhenkhat tan chuan a thlakhlelhawm viau ang. Chung zawng zawng kalsan ngama ZPM zawmtute hnenah hian lawmthu ka sawi a ni," a ti a, ZPM zawm tharte lawmthu a hrilh.

ZPM adviser K Chalkhuma pawhin thu sawiin, "YMA-ah leh MPF-ahte theihtawpin ka lo inhmang tawh a, ram siamṭhat duh chuan a chhunga luh a ngai. Tuna kan sorkar kal mekah zaah zain tidik thei lo mah ila, kan sorkar hotute kal danah hian ram siamṭhat tak tak tumna awmin ka hria a, a la lungawithlak hlein ka hria," a ti.

ZPM thuchhuah tarlan danin, K Sapdanga hian Champhai District Hqrs. BJP president C Lalrosiama hoin BJP member 134 chu ZPM-ah a lawm lut a ni.