Hmeichhe chunga hleilenna tihbona tura beihpui thlakna ni 16 awh khâr

Lunglei District Hub for Empowerment of Women bultuma hmeichhe chunga hleilenna thleng ṭhin tibo tura ni 16 awh beihpui thlakna, '16 Days Campaign on Elimination of Gender Based Violence' kalpui chu December 6, 2024 khan Sub-Headquarters YMA conference hall-ah khâr a ni.

Khârna inkhawm hi Lunglei ICDS Project child development project officer R Lalhmingliani'n a kaihruai. Khuallian TT Beikhaizi, SDO (Sadar) chuan, hmeichhiate chunga hleilenna tih chuan kut inthlak chauh a huam loh thu a sawi a, hleilenna a thlenin dan anga rorel a nih theih nan thuneitute hnena thlen vat a pawimawh thu te, chhungkua leh kohhranah hmeichhiate venhimna lam inzirtir uar zel a ṭul thu te, hmeichhiate pawhin mipate an zah thiam a ngaih thute a sawi bawk.

16 Days Campaign on Elimination of Gender Based Violence puala poster insiamsiak lawmman sem a ni a; pakhatna PC Lalruatdika, IPR department-in Rs 7,000 a dawng a, pahnihna Lalthianghlima, WCD department-in Rs 5,000 leh pathumna One Stop Centre-in Rs 3,000 an dawng.

Inkhawmah hian DHEW Lungleia gender specialist R Lalhmangaihkimi'n gender based violence chungchang a zirtir a, district mission coordinator K Lalrinawmi'n thu a sawi bawk.