Bomb hmanga sangha mana puhte'n Pawisa cháwi tura tih an la pe lo

Phaizau VC leh an khuaa pawl dang zawng zawng (all NGO)-te telna Joint Committee-in an khawtlangin lui an humhalh chhunga bomb hmanga sangha man vanga Rs. 10,000 cháwi tura an tih Phaizau MNF unit chuan nimin thleng khan pawisa an la chawi lo. Sangha mannaa tel vea sawi Mamit bialtu MLA H Lalzirliana nen pawh inbiakna an la neih loh thu, YMA hruaitute chuan an sawi.

Tarlan tawh angin, Phaizau VC & All NGO Joint Committee chuan November 29, 2020 khan thuchhuah siamin, an bialtu MLA H Lalzirliana bakah, an khua leh Mamita MNF hruaitute'n Tut lui an humhalh huam chhung, Saitlan lipui leh Vaak lipuite chu November 21, 2020 khan jeletine hmanga bomb-in, sangha tam tham tak an man tih an tarlang.

Phaizau Joint Committee chuan, dan bawhchhiat avangin Phaizau MNF unit chu Rs. 10,000 cháwi turin an hriattir a; "Kan Bialtu MLA leh MNF Block hruaitute thil tih dan hi Phaizau khawtlang zah lohna leh min thamlohna lian tak niin kan hria," tiin an lo tarlang tawh a ni.

Phaizau VC & All NGO Joint Committee hian an khuaa MNF unit chu December 4, Zirtawpni ral hmaa Rs. 10,000 chawi turin an hriattir a; MNF unit chuan pawisa hi nimin chawhnu thleng kha chuan an la cháwi lo tih, Phaizau Branch YMA president Zarzoliana chuan a sawi.

Vanglaini palai zawhna chhangin Zarzoliana chuan, MNF unit-te chuan pawisa chàwi an tum nia an hriat thu a sawi a, "Kan chawi ang, chu an ti," a ti. MLA H Lalzirliana nen inbiakna emaw, thil awm dan sawihona emaw an neih leh neih loh zawhna chu, an neih loh thuin a chháng.

Phaizau YMA President chuan, an khuaa MNF unit-te Rs. 10,000 chawi tura an tih bâk chu kawng danga hmalakna an neih loh thu a sawi a; Fisheries department-ah emaw, Mamit district administration-ah emaw an bawhzui rih loh thu Vanglaini a hrilh.

Gelatine hmanga luia sangha manah MLA H Lalzirliana leh MNF hruaitu ṭhenkhatte puh an nih chungchangah hian Phaizau khaw pa pakhat, Chuauthantluanga chuan November 29, 2020 vêk khan 'Thu dik puan chhuahna' tih thupuia hmangin thuchhuah a siam. MLA H Lalzirliana ten bomb hmangin sangha an man loh thu te, an khawtlangin an humhalh loh chinah ngawi a dawh a, a ngawidawha sangha tlate pein a hawntir thute a tarlang.

Phaizau YMA President chuan thuchhuah an lo siam tawhah an chian thu leh, thuchhuah an siama an tarlante chu thu dik a nih thu a sawi a; an khuain lui an humhalh chhunga mi bomb hmanga an man thu hi an lo tarlang tawh.

Hetih lai hian, Mamit Times chanchinbu chuan, Chuauthantluanga chuan VC & All NGO Joint Committee hnenah ngaihdam a díl tawh nia hriat a nih thu a tarlang.

Mamit District Magistrate (DC) chuan kumin September thla laihâwl vel khan thupek chhuahin, Mizorama luiah sangha fuan leh inthlah pun hun a thlen dawn hnaih avangin The Mizoram Fisheries (Amendment) Act (No. 8 of 2016) Section 5(1) & 6 tlawhchhanin khapna thupek a chhuah.

Mamit Bawrhsapin sangha man chungchanga khap a tarlante chu - nghafuan vèn, geletin leh puak thei thil dang hmanga sangha man, túr leh chinai hmanga sangha hrai, dynamo leh electric kháwl dang hmanga sangha mante a ni.

Mizoram Fisheries (Amendment) Act, 2016 Chapter-II, Section-5 (Closed season and fish sanctuary)-ah chuan, sorkarin sangha fuan hun, inthlah pun hun (closed season) laiin sangha man khapna thupek chhuah tur a nih thu a chuang.

Section 5(1)-ah chuan sanghate chu tihbuai lohin, zalên tak leh him taka inthlah puntir tur a nih thu leh, hemi hun lai hian sangha man hrim hrim (eng hmanraw hmang pawhin) phal loh a nih thu a inziak. He dan hi 'Government water body' huam chhungah hman tur a ni a; Mizoram Fisheries (Amendment) Act, 2016-in a hrilhfiahnaah chuan, 'Government water body' hian Mizorama lui zawng zawng leh a fintute a huam a ni.

Mizoram Fisheries (Amendment) Act, 2016 Chapter-II, Section 5 (1), (2) leh (3) bawhchhiate chu thla khat chhung tàntir emaw, Rs. 5,000 aia tam lo chawitir emaw, a pahnihin emaw hrem theih a ni.

Mizorama sangha fuan hun dáwn hnaiah leh sangha fuan hun lai vel, October leh November thlaahte khan tualchhunga TV channel-ah Fisheries minister K Lalrinliana thuchah (video) tawitê tihchhuah ṭhin a ni.

Fisheries Minister hian a thuchahah, sangha fuan hun lai a nih avangin eng hmanraw hmang pawha sangha man phal a nih loh thu te, Mizoram mipuite chu sangha fuan véng lo tura ngenna te, sangha mantute chu dan anga hrem theih an nih thute a sawi.

Fisheries Joint Director-in thuchah a siamah pawh, sanghate chu phalna nei loin luia engtik lai maha man phal a nih loh thu te, phalna erawh Fisheries department-ah lâk theih a nih thu te, phalna nei loa sangha mante chu dan anga hrem theih an nih thute a sawi bawk.