2014-15 chhungin nau 21,783 piang Nausen thi - 822; nu nau chunga thi - 21

Sorkar kum liam ta, 2014-15 chhung khan Mizorama damdawi-in hrangah damlo admit mi 1,03,872 awmin, chung zinga mi 2,188 chu damdawi-inah an thi. Nau piang 21,783 chhinchhiah a ni a, nausen kum khat hnuai lam thi 822 awmin, Infant Mortality Rate (IMR) chu 37.74 a ni a; raicheha thi nu 21 an awm bawk.

Nimin khan Health directorate conference hall-ah National Health Mission (NHM) leh Reproductive & Child Health (RCH) hnuaia kum 2014-15 chhunga hnathawhte thlirletna, review meeting neih a ni.
Meeting hi NHM mission director Dr K Lalbiakzuala'n a kaihruai a; Health directorate-a officer te, district tina chief medical officer, senior medical officer, medical superintendent, gynaecologist, paediatrician, district programe manager, accountant leh executive assistant-te an tel. Review meeting hi vawiinah chhunzawma zawh a ni ang.
Review meeting-ah hian RCH state programe officer Dr R Lalthanga'n report a pek danin, April 2014 - March 2015 chhung khan sorkar damdawi-ina OPD-ah mi 11,99,463 inentirin, mi 1,03,872 admit an ni a; admit zinga mi 2,188 (2.11%) chu an thi a ni. Zai tawk mi 46,765 awmin, chungte chu major operation mi 15,777 leh minor operation mi 30,988 an ni a; AYUSH OPD bika inentir mi 32,760 an awm.
Kum 2014-15 chhunga nau piang chhinchhiah zat chu 21,783 a ni a; damdawi-ina nau piang zat chu 19,660 (90.25%) niin, ina nau piang zat chu 2,123 (9.65%) a ni. Nau piang zawng zawng zinga 3,299 15.14%) chu zai chhuah, Caesarean section (C-section) an ni.
Sorkar kum liam ta chhunga nausen kum khat hnuai lam thi zat chu 822 a ni a, IMR chu 37.74 (nausen 1,000 zelah nausen 37.74 an thi tihna) a ni. Nu nau chunga thi mi 21 an awm a; Maternal Mortality Rate (MMR) chu 96.40 (nu nau nei 1,00,000 zelah 96.40 an thi tihna) a ni. (Nu nau hring zat hi nau piang zat 21,783 anga ngaih a ni a, MMR pawh 21,783 aṭanga chhût a ni).
Kum 2014-15 chhung khan nu naupai, health sub-centre-a inziak lut leh inentir ṭhin 23,475 an awm a, chung zinga 465 chu naupai lama harsatna nei leh enkawl zui an ni a; nu nau pâi zingah thisen nei tlem (Anaemia) enkawl ngai enkawl 8,562 an awm.
Nau neih aṭanga ni 14 chhunga in lama enfiah zui (post natal check-up) 18,364 an awm a, chung zinga ṭhat lohna nei treatment pek zat chu 50 an ni. Nausen hri danna (vaccine) a hun taka la kim zat chu 18,537 an ni a; nu insiam (tubectomy) 1,208 an awm a, indanna (Copper-T ) hmang 2,531 an awm bawk.
Meeting-ah hian, nausen thi tamna Saiha district leh Lawngtlai district-ah nausen damlo enkawlna bik (SNCU) hawn a ni tawh tih an tarlang a; IMR leh MMR a hniam theih nan district tinah mipuite zirtirna kalpui a nih thu an sawi.
Mizoram IMR 37.74 a nih laiin, India ram puma IMR chu 40 a ni a; IMR sanna ber state chu Assam leh Madhya Pradesh niin, an IMR chu 54 a ni. Nausen thi tlemna ber Goa-a IMR chu 9 a ni thung.
Mizorama IMR hniam chak loh chhan ber chu - nausen enkawl dan kan thiam tâwk loh vang te, an hriselna tura in chhung khur tihfai leh environmental hygiene lama la hniam vang te, doctor-te pan vat nacháng hriat tâwk loh vangte a nih thu an sawi.