KHAWTHLIR

Thisen pe
Khawzawl Group YMA chuan, nimin khan Khawzawl Zuchhip YMA Hall-ah blood donation camp an huaihawt a, Aizawl Civil Hospital tan thisen unit 225 an pe a, a petute mipa 196 leh hmeichhia 29 an ni.

Dampa-ah man
Dampa Tiger Reserve-a wildlife guard-te chuan June 2, 2015 khan Dampa Tiger Reserve chhunga lut rû Bangladesh mi pahnih - Isreltang Reang leh Gunadhar Reang an man a, an kut aṭangin Kêlrál (clouded leopard) vun leh ruh eng emaw zat an mansak bawk. Mi pahnihte hi Aizawl Chief Judicial Majistrate hmaa hruai an nih hnuah June 3 khan Central Jail-ah dah luh an ni.

Lirthei kal khap
Aizawl Traffic SP chuan thupek chhuahin, Inrinni zing dar 6 aṭanga tlai dar 6 inkar chhungin Mission Venga Venghnuai pêng leh Damveng inkar kawngpuiah lirthei kal a khap. Thupek hian chhiatrupna vanga thil pawimawh tihna thil a huam lo ang.

Ph.D hmu thar
Elizabeth Niang Tawi Mang d/o M GinLam (L), Electric Veng, Aizawl chuan Mizoram University-a Social Work department aṭangin doctor of philosophy a hmu thar a, a thesis chu 'HIV/AIDS and Reproductive Health in Mizoram' tih a ni.

Kum 10 táng dawn
April 2014-a hmeichhe naupang pawngsualtu Lalhmangaihkhumtira (29) s/o Laltlanthanga, Thenzawl chu Additional District & Sessions Judge Vanlalenmawia chuan kum 10 táng tur leh Rs. 10,000 chawi turin a hrem a, pawisa a chawi loh chuan thla hnih dang tàn belh turin a ti bawk.

Ruang chhar
Nimin chawhma dar 10 vel khan Champhai leileta thlám pakhat bulah leilet enkawltu Khuangthanmawii (38) w/o Angu Sahu ruang chhar a ni. Khuangthanmawii hian a bekah hliam a tuar a; thu zawhfiah atan a pasal chu police-te'n an la.

MGNREGA zirho
Nimin khan Khawbung BNRGSK conference hall-ah Khawbung RD Block chhunga V/C leh VEC member tharte pualin MGNREGA chungchang zirhona buatsaih a ni a, V/C leh VEC member thar ṭhahnem tak an tel. Khawbung BDO James Lalnithanga'n MGNREGA-a thil pawimawh hrang hrangte a hrilhfiah.

Videography zirho
Mizoram University-a Department of Mass Communication leh Sony company-te ṭang­­kawp chuan nimin khan MZU-ah 'Videography workshop' an buatsaih. Workshop-ah hian zirlaite leh videography-a tui mite an tel a, Workshop-ah hian New Delhi aṭanga kal Keshav Sharma-a'n a zirtir a ni.

Zirlai hlawhtlingte chawimawi
Rengtekawn High School chuan nimin khan HSLC exam 2015 a an zirlai hlawhtlingte chawimawina hun an hmang a, parliamentary secretary (Education) Joseph Lalhimpuia'n a hmanpui. Rengtekawn High School hi kum 2004 khan khawtlang mi ṭhahnemngaiten an din a ni.